মাৰ্কিন ৰাষ্ট্ৰপতি ড’নাল্ড ট্ৰাম্পে অহা ১৪ এপ্ৰিলৰ ভিতৰত ইৰাণক এক সময়সীমা জাৰি কৰিছে। তেহৰানে হৰমুজ জলদ্বীপ মুকলি নকৰিলে ইৰাণক ধ্বংস কৰি ইয়াৰ তৈল সম্পদ জব্দ কৰাৰ হুংকাৰ দিছে। ইফালে আমেৰিকা আৰু ইৰাণৰ মাজত ৪৫ দিনীয়া যুদ্ধবিৰতিৰ আলোচনা চলি থকা বুলি এক প্ৰতিবেদন প্ৰকাশ পাইছে।
কূটনৈতিক প্ৰচেষ্টাৰ সৈতে পৰিচিত চাৰিটা সূত্ৰৰ উদ্ধৃতি দি এই দাবী কৰা হৈছে। প্ৰতিবেদনত উল্লেখ কৰা হৈছে যে পাকিস্তান, ইজিপ্ত, আৰু তুৰস্কৰ জৰিয়তে আলোচনা চলি আছে আৰু আমেৰিকাৰ দূত ষ্টিভ উইটকফ আৰু ইৰাণৰ বৈদেশিক মন্ত্ৰী আব্বাছ আৰাঘচিৰ মাজত গোপনীয় আদান-প্ৰদান চলি আছে।
প্ৰতিবেদনত আৰু কোৱা হৈছে যে অহা ৪৮ ঘণ্টাৰ ভিতৰত চুক্তি হোৱাৰ সম্ভাৱনা নাই। কিন্তু যুদ্ধৰ অধিক তীব্ৰতা বৃদ্ধি ৰোধৰ বাবে ইয়াক “শেষ প্ৰচেষ্টা” বুলি গণ্য কৰা হৈছে।
আমেৰিকাৰ ৰাষ্ট্ৰপতি ড’নাল্ড ট্ৰাম্পে ৫ এপ্ৰিলত ইৰাণৰ বাবে হৰমুজ জলদ্বীপ পুনৰ মুকলি কৰাৰ বাবে চুক্তিবদ্ধ হোৱাৰ সময়সীমা ২৪ ঘন্টা বৃদ্ধি কৰে। অন্যথা আন্তঃগাঁথনিৰ ক্ষেত্ৰতো ইৰাণে আক্ৰমণৰ সন্মুখীন হ’ব লাগিব বুলি তেওঁ সকীয়াই দিয়ে।
