পাকিস্তানৰ কৰাচী চহৰত বিগত ৩দিনত ৩খন কে এফ চি ৰেষ্টুৰেণ্ট আৰু ডমিন’জ পিজ্জা আউটলেটত আক্ৰমণ চলাই কিছু প্ৰতিবাদকৰীয়ে। কিয়নো পাকিস্তানীসকলে অনুভৱ কৰে যে তেওঁলোকে ইজৰাইলী সেনালৈ আৰ্থিক সহায় আগবঢ়ায়।
ইয়াৰ ফলত দেশখনত বিস্তৰ ক্ষতিসাধন হয় যদিও কোনো লোকৰ প্ৰাণহানি হোৱা নাই।
এই ক্ষেত্ৰত আৰক্ষীয়ে কয় যে, গাজাত ইজৰাইলে কৰা আক্ৰমণৰ প্ৰতিশোধ হিচাপে এই আক্ৰমণ কৰা হৈছে। কিয়নো প্ৰতিবাদকৰীয়ে এই দুটা ইজৰাইলী ব্ৰেণ্ড বুলি ভাবিছে।
২০২৩ চনৰ অক্টোবৰ মাহত গাজাত ইজৰাইলৰ আক্ৰমণ আৰম্ভ হোৱাৰ পিছৰে পৰা কেইবাখনো মুছলমান দেশত পশ্চিমীয়া ব্ৰেণ্ডৰ বৰ্জনৰ অভিযান চলি আহিছে। বিডিএছ আন্দোলনৰ নেতৃত্বত বিশ্বব্যাপী পেলেষ্টাইন নেতৃত্বাধীন অভিযান, যিয়ে আন্তঃৰাষ্ট্ৰীয় আইনৰ অধীনত পেলেষ্টাইনৰ অধিকাৰক সন্মান কৰিবলৈ ইজৰাইলৰ ওপৰত হেঁচা দিয়াৰ পোষকতা কৰে।
সংবাদ মাধ্যমক জনোৱা অনুসৰি, প্ৰায় ১০০ৰ পৰা ১৫০ জনীয়া এটা দলে এই দুই বহুজাতিক আউটলেট ভাঙি পেলোৱাৰ চেষ্টা চলোৱাৰ লগতে ৰাষ্ট্ৰীয় ঘাইপথটোও অৱৰোধ কৰে। অৱশেষত আৰক্ষী সেই ঠাইত উপস্থিত হৈ দুইটা আউটলেটৰ ক্ষতিৰ পৰা ৰক্ষা কৰাৰ লগতে ৯ জন লোককো গ্ৰেপ্তাৰ কৰে।
৮ এপ্ৰিলত কৰাচীৰ কে এফ চি আৰু ডমিন’জ পিজ্জা ৰেষ্টুৰেণ্টত প্ৰায় ৩৫ জনীয়া এটা দলে আক্ৰমণ চলাইছিল, য’ত ১০ জন সন্দেহযুক্ত লোকক গ্ৰেপ্তাৰ কৰা হৈছিল। উপ-মহাপৰিদৰ্শক চৈয়দ আছাদ ৰাজাই কয় যে, ‘গাজাৰ পৰিস্থিতিক লৈ ক্ষোভৰ বাবেই এই খাদ্যৰ বিপণীটোত আক্ৰমণ সংঘটিত হৈছে।
এই আন্দোলনে ইজৰাইলত বিনিয়োগ কৰা বা ইজৰাইলী কোম্পানী বুলি কোৱা কিছুমান কোম্পানী আৰু সংস্থা বৰ্জনৰ আহ্বান জনাইছে। এই অভিযানৰ প্ৰকৃত উদ্দেশ্য হৈছে ইজৰাইলৰ অৰ্থনৈতিক ক্ষতি কৰা।
এইক্ষেত্ৰত কে এফ চি কোম্পানীটোৱে কয় যে, এইয়া অৰাজনৈতিক ঘটনা। ইজৰাইলৰ সামৰিক বাহিনী বা চৰকাৰক সমৰ্থন নকৰে এই কোম্পানীটোৱে। ইফালে ডমিন’জেও বিডিএছ বৰ্জনৰ তালিকাত আছে। অভিযোগ কৰা হৈছে যে ডমিন’ছে ইজৰাইলী সেনাক সমৰ্থন কৰে যদিও কোম্পানীটোৱে ইয়াক পূৰ্বৰে পৰা অস্বীকাৰ কৰি আহিছে।
