২১ মেত নিশা কেপিটেল ইহুদী সংগ্ৰহালয়ৰ সমীপত ৱাশ্বিংটন ডিচিত ইজৰাইলৰ দূতাবাসৰ দুজন কৰ্মচাৰীৰ প্ৰাণহানি হয়। প্ৰায় ১বছৰ ধৰি পেলেষ্টাইন সমৰ্থক প্ৰতিবাদ আৰু ইজৰাইল বিৰোধী প্ৰতিবাদৰ পিছত আমেৰিকাত এইটোৱেই প্ৰথম কাণ্ড।
ছ’চিয়েল মিডিয়াত দাবী কৰা হৈছে যে, এজন সন্দেহযুক্ত লোকে পেলেষ্টাইনী কাফিয়া পিন্ধি সংগ্ৰহালয়ৰ কাষ চাপি অহা দেখা গৈছে।
সংবাদ মাধ্যমত গৃহ নিৰাপত্তা সচিব ক্ৰীষ্টি ন’মে প্ৰকাশ কৰা এটা পোষ্টত ন’মে কয় যে, নিশা ৱাশ্বিংটন ডি চিৰ ইহুদী সংগ্ৰহালয়ৰ ওচৰত ইজৰাইলৰ দূতাবাসৰ দুজন কৰ্মচাৰীক অৰ্থহীনভাৱে হত্যা কৰা হয়।ইয়াৰ বাবে আমেৰিকাই সক্ৰিয়ভাৱে তদন্ত কৰি আছে আৰু অধিক তথ্য শ্বেয়াৰ কৰিবলৈ অপেক্ষা কৰি আছে।
আৰক্ষীয়ে এই সন্দৰ্ভত তদন্ত আৰম্ভ কৰা বুলি জানিবলৈ দিয়ে। সংগ্ৰহালয়ৰ পৰা কিছু দূৰৈত থকা এফ বি আইৰ কাৰ্যালয়ৰ ওচৰত সংঘটিত হৈছে এই গুলীচালনা। তেওঁ লগতে কয় যে ইজৰাইলৰ দূতাবাসে এই বিষয়ত আইন প্ৰয়োগকাৰী সংস্থাৰ সৈতে ঘনিষ্ঠভাৱে কাম কৰি আছে।
ইজৰাইলৰ দূতাবাসৰ এগৰাকী মুখপাত্ৰই সংবাদ মাধ্যমক জনোৱা অনুসৰি, ইজৰাইলৰ ৰাষ্ট্ৰদূতগৰাকী এই কাণ্ডৰ সৈতে জড়িত নাছিল আৰু গুলীচালনাৰ সময়ত সেই স্থানত নাছিল। আমেৰিকাৰ এটৰ্নী জেনেৰেল পেম বণ্ডীয়ে ছ’চিয়েল মিডিয়াত জনাইছে যে, তেওঁ আৰু ডিচিৰ ভাৰপ্ৰাপ্ত আমেৰিকাৰ এটৰ্নী জিনিন পিৰ’ই কেপিটেল ইহুদী মিউজিয়ামৰ বাহিৰত গুলীচালনাৰ স্থানত উপস্থিত হৈছে।
আমেৰিকাত ক্ৰমাৎ বৃদ্ধি পোৱা ইহুদী বিৰোধী কাণ্ডই ইহুদী আৰু ইজৰাইল সমৰ্থক লোকসকলৰ মাজত ভয়ৰ সৃষ্টি কৰিছে। ২০ লাখ গাজাৰ জনসংখ্যাক অনাহাৰৰ মাজলৈ ঠেলি দিয়া আৰু গণহত্যা কৰাৰ বাবে আমেৰিকাত ইজৰাইলৰ বিৰোধিতা বৃদ্ধি পাইছে আৰু ইয়াৰ পৰিণাম আমেৰিকাতো দেখা যায়।
