লেবাননৰ ৰাজধানী বেইৰুটৰ দক্ষিণ চুবুৰী ডাহিয়েত ২৩ নৱেম্বৰত ইজৰাইলে বৃহৎ বিমান আক্ৰমণ চলায়। ইজৰাইল প্ৰতিৰক্ষা বাহিনীয়ে দাবী কৰিছে যে, এই আক্ৰমণত হিজবুল্লাহৰ মুখ্য কৰ্মচাৰী হাইথাম আলী টাবাতাবাই নিহত হৈছে। অৱশ্যে এই কথা এতিয়াও নিশ্চিত কৰিব পৰা নাই হিজবুল্লাহই।
এই আক্ৰমণ ইমানেই শক্তিশালী আছিল যে বিস্ফোৰণৰ পিছত মানুহে অট্টালিকাৰ পৰা লৰালৰিকৈ ওলাই আহিছিল, যাৰ ফলত সমগ্ৰ অঞ্চলটোত আতংকৰ সৃষ্টি হৈছিল। লগতে বহু যান-বাহন আৰু অট্টালিকাও ক্ষতিগ্ৰস্ত হয়।
বিগত বৰ্ষৰ ৮ অক্টোবৰৰ পৰা ইজৰাইল আৰু হিজবুল্লাহৰ মাজত চলি আছে যুদ্ধ। গাজাত মিত্ৰ দেশসমূহক সমৰ্থন কৰিবলৈ হিজবুল্লাই এই যুদ্ধৰ সূচনা কৰিছিল। ছেপ্টেম্বৰ মাহত ইজৰাইলৰ “পেজাৰ্ছ অপাৰেচন”ৰ পিছত উত্তেজনা আৰু অধিক বৃদ্ধি পায়।
লেবাননৰ স্বাস্থ্য মন্ত্ৰ্যালয়ে জনোৱা মতে, এই আক্ৰমণত কমেও ৫ জন লোক নিহত হোৱাৰ লগতে ২০ জনতকৈ অধিক লোক আহত হৈছে। কেইবামাহো ধৰি বেইৰুটত সংঘটিত এইটোৱেই আছিল সৰ্ববৃহৎ আক্ৰমণ, যাৰ ফলত আশংকাৰ সৃষ্টি হৈছিল।
আমেৰিকাৰ বিষয়াসকলৰ মতে, ইজৰাইলে এই আক্ৰমণৰ বিষয়ে আগতীয়াকৈ আমেৰিকাক অৱগত কৰা নাছিল। আক্ৰমণৰ পিছতহে ৱাশ্বিংটনে এই কথা জানিব পাৰিলে। অৱশ্যে লেবাননত ইজৰাইলৰ বৃহৎ অভিযানৰ আগতীয়া সম্ভাৱনাৰ কথাও আমেৰিকাই আশা কৰিছিল বুলিও খবৰ ওলাইছিল। এই আক্ৰমণে অঞ্চলটোত আৰু অধিক উত্তেজনা বৃদ্ধি কৰিছে।
