প্ৰাক্তন উপ-ৰাষ্ট্ৰপতি জগদীপ ধনখড়ক লৈ ওলাইছে এক ডাঙৰ খবৰ। শীঘ্ৰে উপ-ৰাষ্ট্ৰপতি হিচাপে দিয়া চৰকাৰী বাসগৃহ এৰি যাব প্ৰাক্তন উপ-ৰাষ্ট্ৰপতিয়ে।
ৰাজস্থান বিধানসভাত নিজৰ বাবে পেঞ্চনৰ বাবে আবেদন জনাইছে জগদীপ ধনখড়ে। আচলতে তেওঁ পূৰ্বতে কংগ্ৰেছৰ পৰা টিকট লাভ কৰি ৰাজস্থানত বিধায়ক হিচাপে আছিল। কিন্তু উপ-ৰাষ্ট্ৰপতি হোৱাৰ পিছত তেওঁৰ সেই পেঞ্চন বন্ধ হৈ পৰিলে, পিছে এতিয়া তেওঁ প্ৰাক্তন বিধায়ক হিচাপে পুনৰ পেঞ্চন পাব পাৰে কাৰণ ৰাজস্থানত এটা নিয়ম আছে যে যদি কোনো ব্যক্তি বিধায়ক হোৱাৰ পিছত সাংসদ আৰু মন্ত্ৰী হয়, তেন্তে তেওঁ বিভিন্ন পদৰ বাবে পেঞ্চন পায়।
৯ ছেপ্টেম্বৰত উপ-ৰাষ্ট্ৰপতি পদৰ নিৰ্বাচন অনুষ্ঠিত হ’ব আৰু তাৰ পূৰ্বে জগদীপ ধনখড়ে (৭৪) সংসদ ভৱন কমপ্লেক্সৰ সমীপৰ চাৰ্চ ৰোডত অৱস্থিত উপ-ৰাষ্ট্ৰপতিৰ বাসগৃহ খালী কৰিব লাগিব। স্বাস্থ্যজনিত কাৰণত ২১ জুলাইত নিজ পদৰ পৰা পদত্যাগ কৰে ধনখড়ে।
জগদীপ ধনখড়ে বিগত বছৰৰ এপ্ৰিল মাহত উপ-ৰাষ্ট্ৰপতিৰ চৰকাৰী বাসগৃহলৈ স্থানান্তৰিত হৈছিল। সূত্ৰ অনুসৰি চৰকাৰী বাসগৃহ নোপোৱালৈকে তেওঁ ছাটাৰপুৰ এনক্লেভত থাকিব। নিয়ম অনুসৰি প্ৰাক্তন ৰাষ্ট্ৰপতি, উপ-ৰাষ্ট্ৰপতি আৰু প্ৰধানমন্ত্ৰীক টাইপ-৮ বাংলো আবণ্টন দিয়া হয়। গৃহ নিৰ্মাণ আৰু নগৰ পৰিক্ৰমা মন্ত্ৰালয়ে (Directorate of Estates) তেওঁলোকৰ বাবে থকাৰ ব্যৱস্থা কৰে।
