ইংলেণ্ড ক্ৰিকেট দলৰ প্ৰাক্তন কিংবদন্তি বেগী বলাৰ জেমছ এণ্ডাৰছনক হয়টো চিনি নোপোৱা কোনো ক্ৰিকেট অনুৰাগী নাই। টেষ্ট ক্ৰিকেটত সৰ্বাধিক উইকেট দখল কৰা বেগী বলাৰ হৈছে এণ্ডাৰছন।
শেহতীয়াকৈ টকস্প’ৰ্ট ক্ৰিকেট ইউটিউব চেনেলত প্ৰাক্তন সতীৰ্থ ষ্টিভ হাৰমিছনৰ সৈতে বিশেষ সাক্ষাতকাৰত অংশ লৈছিল প্ৰাক্তন বেগী বলাৰগৰাকীয়ে। এই সময়ছোৱাত দুয়োজন কিংবদন্তিৰ মাজত সেই শ্ৰেষ্ঠ খেলুৱৈসকলৰ বিষয়ে আলোচনা হৈছিল। যাৰ লগত তেওঁ ক্ৰিকেট খেলপথাৰত মুখামুখি হৈছে।
কেৱল এয়াই নহয়, কথা-বতৰাৰ সময়ত যেতিয়া এণ্ডাৰছনক তেওঁৰ সৰ্বকালৰ শ্ৰেষ্ঠ একাদশৰ বিষয়ে সোধা হৈছিল, তেতিয়া তেওঁ কিছুমান কিংবদন্তিক আওকাণ কৰি সকলোকে আচৰিত কৰি তুলিছিল।
জেমছ এণ্ডাৰছনে নিৰ্বাচন কৰা শ্ৰেষ্ঠ মূল একাদশ
এণ্ডাৰছনে নিজৰ দলৰ অপেনাৰ হিচাপে নিৰ্বাচিত কৰিছে এলেষ্টাৰ কুক আৰু বীৰেন্দ্ৰ ছেহৱাগক। মিডল অৰ্ডাৰৰ দায়িত্ব বিৰাট কোহলী, জো ৰুট আৰু শচীন টেণ্ডুলকাৰৰ কান্ধত। উইকেটকীপাৰ হিচাপে তেওঁ ভাৰতীয় যুৱ তাৰকা ঋষভ পন্তৰ বাহিৰে আন কাকো নিজৰ দলত অন্তৰ্ভুক্ত কৰা নাই।
অলৰাউণ্ডাৰ হিচাপে দলত স্থান দিছে এন্দ্ৰিউ ফ্লিনটফক। ইয়াৰ পিছত ষ্টুৱাৰ্ট ব্ৰড, গ্লেন মেকগ্ৰাথ আৰু ডেল ষ্টেইনক বেগী বলাৰ হিচাপে দলত স্থান দিছে। আনহাতে একমাত্ৰ স্পিনাৰ হিচাপে এণ্ডাৰছনৰ দলত আছে শ্বেন ৱাৰ্ন।
