শেহতীয়াকৈ বানে ভয়ংকৰ ৰূপ ধাৰণ কৰা অসমত এইবাৰ জাপানীজ এনকেফেলাইটিছে লৈছে ভয়ংকৰ ৰূপ। প্ৰতিখন জিলাতে জাপানীজ এনকেফেলাইটিছত আক্ৰান্ত হৈছে বহু লোক। বৰ্তমানলৈ সমগ্ৰ অসমত ১৮৭ জন লোক জাপানীজ এনকেফেলাইটিছ ৰোগত আক্ৰান্ত হৈছে।
বিগত ২৪ ঘন্টাত অসমত শিশুসহ দুজন লোক জাপানীজ এনকেফেলাইটিছ ৰোগত মৃত্যু হৈছে। সৰ্বমুঠ জাপানীজ এনকেফেলাইটিছ ৰোগত মৃত্যু হোৱা ৰোগীৰ সংখ্যা ৪ জন।
মৃত্যু হোৱা ৰোগী দুজনৰ এজন হৈছে মৰিগাঁও জিলাৰ আমচৈৰ ১২ বছৰীয়া মাধুৰ্য মনোৱাৰ। বিগত ৮ দিন ধৰি গুৱাহাটী চিকিৎসা মহাবিদ্যালয়ত চিকিৎসাধীন হৈ থকাৰ পিছত বুধবাৰে মৃত্যু হয় মাধুৰ্যৰ।
আনহাতে দেৰগাঁৱত জাপানীজ এনকেফেলাইটিছত ৰাকেশ ৰাগ গগৈ নামৰ এজন ৩৭ বছৰীয়া কণ্ঠশিল্পীৰ অসম মেডিকেল কলেজ হাস্পতালত চিকিৎসাধীন অৱস্থাত মৃত্যু ঘটে। ২ জুলাইত ডিব্ৰুগড়ৰ অসম মেডিকেল কলেজ হাস্পতালত ভৰ্তি কৰোৱা ৰাকেশ ৰাগৰ মঙলবাৰে মৃত্যু হয়।
উল্লেখ্য যে, বিগত ছয়মাহৰ ভিতৰত ৰাজ্যত জাপানীজ এনকেফেলাইটিছৰ ফলত ৮ জনৰ মৃত্যু হয়। ইয়াৰ ভিতৰত যোৰহাট জিলাত ১ জন, কামৰূপত ১ জন, শিৱসাগৰত ৩ জন, শোণিতপুৰত ১ জন আৰু ধেমাজিত ২ জন ৰোগীৰ মৃত্যু হৈছে।
ইফালে, সমগ্ৰ অসমত জাপানীজ এনকেফেলাইটিছত আক্ৰান্ত ৰোগীৰ সংখ্যা ১৮৭ গৰাকী। গুৱাহাটী চিকিৎসা মহাবিদ্যালয়ত ভৰ্তি হোৱা ৰোগীৰ সংখ্যা ২৪ গৰাকী। ইয়াৰ ভিতৰত ১২ গৰাকীয়ে আৰোগ্য লাভ কৰে। বৰ্তমান চিকিংসা মহাবিদ্যালয়খনত চিকিৎসাধীন হৈ আছে ১২ গৰাকী ৰোগী। এই তথ্য জনাইছে চিকিৎসা মহাবিদ্যালয়খনৰ অধীক্ষক অভিজিৎ শৰ্মাই।
ইফালে, জি এম চি এইছত ভৰ্তি হৈ থকা ৰোগী সকলৰ ভিতৰত দুজনৰ অৱস্থা বৰ্তমানো সংকটজনক বুলি জনাইছে গুৱাহাটী চিকিৎসা মহাবিদ্যালয়ৰ অধীক্ষক ডাঃ অভিজিৎ শৰ্মাই।
