অসমৰ ক্ৰীড়াপ্ৰেমীৰ বাবে এটা ভাল খবৰ। এথলেটিক ফেডাৰেচন অৱ ইণ্ডিয়াৰ উপ-সভাপতি পদত অধিষ্ঠিত হ’ল অসম চৰকাৰৰ জনস্বাস্থ্য কাৰিকৰী আৰু গুৱাহাটী উন্নয়ন মন্ত্ৰী জয়ন্তমল্ল বৰুৱা। চাৰি বছৰীয়া কাৰ্যকালৰ বাবে মন্ত্ৰী বৰুৱাই বিনা প্ৰতিদ্বন্দ্বিতাৰে উপ-সভাপতি পদত নিৰ্বাচিত হয়।
চণ্ডীগড়ত অনুষ্ঠিত হোৱা এথলেটিক ফেডাৰেচন অৱ ইণ্ডিয়াৰ বাৰ্ষিক সাধাৰণ সভাত মন্ত্ৰী বৰুৱাক উপ-সভাপতি হিচাপে নিৰ্বাচিত কৰা হয়।
এথলেটিক ফেডাৰেচন অৱ ইণ্ডিয়াৰ অধ্যক্ষ পদত অধিষ্ঠিত হয় বাহাদুৰ সিং। সম্পাদক পদত সন্দীপ মেহতা আৰু জ্যেষ্ঠ উপাধ্যক্ষ পদত প্ৰাক্তন এথলীট অঞ্জু ববি জৰ্জ নিৰ্বাচিত হয়।
সাধাৰণ সভাৰ পিছতে নৱনিৰ্বাচিত উপাধ্যক্ষ জয়ন্তমল্ল বৰুৱাই ফেডাৰেচনৰ নৱনিৰ্বাচিত সদস্যসকলক অসমৰ স্বাভিমান গামোছাৰে সম্বৰ্ধনা জনায়। এই ভিডিঅ’ মন্ত্ৰী জয়ন্ত মল্ল বৰুৱাই নিজৰ ফেচবুক পেজযোগে শ্বেয়াৰ কৰিছে।
তেওঁ লগতে ফেডাৰেচনে ন্যস্ত কৰা আস্থা আৰু দায়িত্বই গভীৰভাৱে সন্মানিত কৰা বুলিও মন্তব্য কৰে।
উল্লেখ্য যে, সম্প্ৰতি আছাম এথলেটিকছ এছ’চিয়েচনৰ সভাপতিৰ দায়িত্বত আছে জয়ন্তমল্ল বৰুৱা। নৱনিৰ্বাচিত এথলেটিক ফেডাৰেচন অৱ ইণ্ডিয়াৰ উপাধ্যক্ষ পদত নিৰ্বাচিত হোৱাত মন্ত্ৰী জয়ন্তমল্ল বৰুৱাক বিভিন্নজনে শুভেচ্ছা জ্ঞাপন কৰিছে।
