ধৰ্মীয় চহৰ কাশীত নৱৰাত্ৰিৰ সময়ত আমিষ খাদ্য বিক্ৰীত নিষেধাজ্ঞা আৰোপ কৰা হৈছে। পৌৰ নিগমৰ কাৰ্যনিৰ্বাহক বৈঠকত এই সিদ্ধান্ত লোৱা হয়।
সমগ্ৰ নৱৰাত্ৰিত কাশীত বন্ধ থাকিব সকলো আমিষ খাদ্যৰ দোকান। নৱৰাত্ৰি উৎসৱ ৩০ মাৰ্চৰ পৰা ৬ এপ্ৰিললৈ হ’ব। এনে পৰিস্থিতিত ৩১ মাৰ্চত পবিত্ৰ ঈদৰ দিনটোতো আমিষ খাদ্যৰ দোকান বন্ধ থাকিব। কাৰ্যবাহী সদস্য মদন মোহনৰ প্ৰস্তাৱৰ ওপৰত গভীৰ বিবেচনাৰ অন্তত এই সিদ্ধান্ত লোৱা হৈছে।
দুদিন পূৰ্বে হিন্দু সংগঠনসমূহেও নৱৰাত্ৰিৰ সময়ত নন-ভেজ বিক্ৰী নিষিদ্ধ কৰাৰ বাবে প্ৰশাসনক স্মাৰক পত্ৰ দাখিল কৰিছিল। স্মাৰক পত্ৰখনৰ জৰিয়তে তেওঁলোকে আবেদন জনায় যে, কাশী পৌৰাণিক নগৰ আৰু নৱৰাত্ৰিৰ সময়ত ইয়াত শক্তি পূজা কৰা হয়। এই সকলোবোৰ বিবেচনা কৰিয়েই নৱৰাত্ৰিত কাশীত আমিষ খাদ্য বিক্ৰীত নিষেধাজ্ঞা আৰোপ কৰা উচিত।
মেয়ৰ অশোক তিৱাৰীয়ে কয় যে, সমগ্ৰ নৱৰাত্ৰিত আমিষ খাদ্যৰ দোকান সম্পূৰ্ণৰূপে বন্ধ থাকিব। এই কথা কঠোৰভাৱে পালন কৰা হ’ব। ইয়াৰ সমান্তৰালকৈ নৱৰাত্ৰি আৰম্ভ হোৱাৰ আগতেই নলা চাফা কৰা, ষ্ট্ৰীট লাইট লগোৱা আৰু পথ নির্মাণ কৰা আদি কাৰ্য সম্পূর্ণ কৰিব লাগে৷ এই সিদ্ধান্তই ঈদৰ উৎসৱতো প্ৰভাৱ পেলাব বুলিও তেওঁ কয়। ঈদও ৩১ মাৰ্চত পৰিছে, গতিকে ইয়াৰ এইবাৰ কাশীত কেৱল মিঠা ঈদহে পালন কৰা হ’ব।
এই সিদ্ধান্ত সন্দৰ্ভত পৌৰ নিগমৰ বিৰোধী দলপতি তথা এছ পি কাউন্সিলাৰ অমৰদেৱ যাদৱে কয় যে, পূৰ্বে কেৱল স্বাধীনতা দিৱস, গণৰাজ্য দিৱস আৰু গান্ধী জয়ন্তীতহে আমিষ খাদ্য বিক্ৰী নিষিদ্ধ কৰা হৈছিল। কিন্তু বিজেপিয়ে এতিয়া সৃষ্টি কৰিছে এক নতুন পৰম্পৰা।এইয়া বিজেপিৰ সংখ্যাগৰিষ্ঠতা বৃদ্ধিৰ এক ষড়যন্ত্ৰ। ইয়াৰ দ্বাৰা বিজেপিয়ে সমাজত সাম্প্ৰদায়িক ৰাজনীতিৰ সৃষ্টি কৰিব বিচাৰিছে।
