২৩ এপ্ৰিল মঙলবাৰে জম্মু-কাশ্মীৰৰ পেহেলগামত সংঘটিত হোৱা সন্ত্ৰাসবাদীৰ আক্ৰমণ সচাঁকৈ গৰিহণাৰ যোগ্য। মঙলবাৰে বিয়লি ৩ বজাত উগ্ৰপন্থীয়ে পেহেলগামৰ সৌন্দৰ্য্য উপভোগ কৰি খকা পৰ্যটকৰ দলক লক্ষ্য কৰি এই আক্ৰমণ সংঘটিত কৰে।
পুলৱামা আক্ৰমণৰ পিছত ভাৰতত এইটোৱেই আটাইতকৈ ডাঙৰ সন্ত্ৰাসবাদী আক্ৰমণ বুলি অনুমান কৰা হৈছে। সমগ্ৰ বিশ্বই এই ঘটনাক গৰিহণা দিছে। ইতিমধ্যে সকলো প্ৰত্যক্ষদৰ্শীয়ে দাবী কৰিছে যে সম্পূৰ্ণ ধৰ্মীয় পৰিচয়ৰ ভিত্তিত এই আক্ৰমণ সংঘটিত হৈছে। ভুক্তভোগীক কলিমা পঢ়িব দিয়াৰ লগতে গুপ্তাংগ পৰীক্ষা কৰা হৈছিল। স্থানীয় সূত্ৰই দাবী কৰিছে যে উগ্ৰপন্থীয়ে সামৰিক পোছাক পৰিধান কৰি আহিছিল।
ইতিমধ্যে পাকিস্তান সমৰ্থিত সন্ত্ৰাসবাদী সংগঠন লস্কৰ-ই-তৈবাৰে এই আক্ৰমণৰ দায়িত্ব স্বীকাৰ কৰিছে। জনা যায় যে, এই সংগঠনটো পাকিস্তানৰ আই এছ আইৰ সহযোগী। সেয়েহে সন্ত্ৰাসবাদী আক্ৰমণত চুবুৰীয়া ৰাষ্ট্ৰ পাকিস্তানো জড়িত থকাৰ স্পষ্ট ইংগিত পোৱা গৈছে। গতিকে ভাৰতে এই ক্ষেত্ৰত পাকিস্তানৰ বিৰুদ্ধে কেনে ধৰণৰ ব্যৱস্থা ল’ব সেয়া লক্ষণীয় হ’ব।
ইতিমধ্যে ভাৰতৰ বৈদেশিক পৰিক্ৰমা মন্ত্ৰালয়ে জনাইছে যে, আমেৰিকাৰ ৰাষ্ট্ৰপতি ড’নাল্ড ট্ৰাম্পেও এই ঘটনা সন্দৰ্ভত ভাৰতৰ প্ৰধানমন্ত্ৰী নৰেন্দ্ৰ মোদীলৈ যোগাযোগ কৰিছে। জম্মু-কাশ্মীৰৰ এই আক্ৰমণক তীব্ৰ গৰিহণা দিছে ট্ৰাম্পে।
তেওঁ কয় যে আমেৰিকাই এই ক্ষেত্ৰত ভাৰতক সকলো ধৰণৰ সহায় আগবঢ়াবলৈ সাজু হৈ আছে। লগতে ট্ৰাম্পে কয় যে, যিকোনো ধৰণৰ সহায়ৰ বাবে আমেৰিকাই ভাৰতৰ কাষত থিয় দিব। এই সন্ত্ৰাসবাদী আক্ৰমণত ভাৰত আৰু আমেৰিকাই একেলগে যুঁজিব বুলি ট্ৰাম্পে জানিবলৈ দিয়ে।
উল্লেখ্য যে, ছৌদি আৰৱ ভ্ৰমণলৈ গৈছিল ভাৰতৰ প্ৰধানমন্ত্ৰী নৰেন্দ্ৰ মোদী। কিন্তু এই আক্ৰমণৰ খবৰ লাভ কৰিয়েই ছৌদি আৰৱৰ ভ্ৰমণ মাজভাগত এৰি দিল্লীত উপস্থিত হয় প্ৰধানমন্ত্ৰী মোদী। আনহাতে আজি শ্ৰীনগৰৰ পৰা পহলগামত উপস্থিত হয় গৃহমন্ত্ৰী অমিত শ্বাহ।
