দেশ জোকাৰি যোৱা কলিকতাৰ আৰ জি কৰ চিকিৎসা মহাবিদ্যালয় হাস্পতালত এগৰাকী কৰ্মৰত মহিলা চিকিৎসকক ধৰ্ষণ কৰি নৃশংসভাৱে হত্যা কৰা ঘটনাৰ মূল অভিযুক্ত সঞ্জয় ৰয়ক সিয়ালদাহ আদালতে দোষী সাব্যস্ত কৰিছে।
আজিৰ এই শুনানীৰ সময়ত আদালতত উপস্থিত আছিল ভুক্তভোগী মহিলাগৰাকীৰ পিতৃ-মাতৃ। ঘটনাটোত দোষী সাব্যস্ত হোৱা সঞ্জয় ৰায়ক কি শাস্তি প্ৰদান কৰে সেয়া ২০ জানুৱাৰীতহে জানিব পৰা যাব। অৰ্থাৎ ২০ জানুৱাৰী (সোমবাৰ)ত শাস্তি ঘোষণা হ’ব।
এটা সংবাদ সংস্থাৰ প্ৰতিবেদন অনুসৰি অভিযুক্ত সঞ্জয় ৰয়ে বিচাৰকৰ আগত কৈছিল, ‘মোক ভুৱা গোচৰত ফচোৱা হৈছে। মই এই কাম কৰা নাছিলো। যিয়ে এই কাম কৰিছিল, তেওঁলোকক এৰি দিয়া হৈছে। এই ঘটনাত এজন IPS বিষয়া জড়িত আছিল।’
উল্লেখ্য যে, ২০২৪ বৰ্ষৰ ৯ আগষ্টৰ পুৱা উত্তৰ কলিকতাৰ চৰকাৰী চিকিৎসা মহাবিদ্যালয়ৰ ৩১ বছৰীয়া প্ৰশিক্ষণৰত মহিলা চিকিৎসকৰ মৃতদেহ উদ্ধাৰ হৈছিল। মহিলা চিকিৎসকগৰাকীৰ শৰীৰত আছিল কেইবাটাও আঘাতৰ চিন।
আদালতে কয় যে অভিযুক্তৰ বিৰুদ্ধে বিএনএছৰ ৬৪, ৬৬, ১০৩/১ ধাৰা আৰোপ কৰা হৈছিল। অভিযুক্তৰ বিৰুদ্ধে অভিযোগ আছিল যে আৰ জি কৰ চিকিৎসা মহাবিদ্যালয় আৰু চিকিৎসালয়ৰ চেমিনাৰ ৰুমত গৈ তাত জিৰণি লৈ থকা এগৰাকী মহিলা চিকিৎসকক ধৰ্ষণ আৰু নৃশংসভাৱে আক্ৰমণ কৰি হত্যা কৰা হৈছিল।
চিকিৎসকগৰাকীৰ হত্যা আৰু ধৰ্ষণৰ গোচৰৰ অভিযুক্ত সঞ্জয় ৰয়ৰ বিচাৰ ৯ জানুৱাৰীত সমাপ্ত হৈছিল। এই সময়ত ৫০ গৰাকী সাক্ষীক সোধা-পোছা কৰা হয়।
মৰণোত্তৰ প্ৰতিবেদন অনুসৰি, অভিযুক্তই ভুক্তভোগীগৰাকীক প্ৰথমে ধৰ্ষণ কৰিছিল আৰু পিছত ডিঙি চেপি হত্যা কৰিছিল। ভুক্তভোগীগৰাকীয়ে মৃত্যু নিশ্চিত কৰিবলৈ দুবাৰকৈ ডিঙি চেপিছিল।
চিকিৎসালয় কৰ্তৃপক্ষই প্ৰথমে এই ঘটনাক আত্মহত্যা বুলি অভিহিত কৰিছিল যদিও সমগ্ৰ ঘটনাৰ সত্যসত্যতা পোহৰলৈ অহাত দেশজুৰি ইয়াৰ বিৰুদ্ধে তীব্ৰ প্ৰতিবাদ সাব্যস্ত হৈছিল।
