উত্তৰ প্ৰদেশৰ ৰাজধানী লক্ষ্ণৌত ৩১ আগষ্টৰ পুৱা সংঘটিত হয় এক মৰ্মান্তিক দুৰ্ঘটনা। লক্ষ্ণৌৰ গুডাম্বা থানা এলেকাৰ বেহতা বজাৰ অঞ্চলৰ এটা ঘৰত চলি থকা এটা অবৈধ আতচবাঁজী কাৰখানাত সংঘটিত হয় এক বৃহৎ বিস্ফোৰণ।
এই দুৰ্ঘটনাত ইতিমধ্যে ২ জন লোকৰ প্ৰাণহানি হোৱাৰ খবৰ পোৱা গৈছে আৰু বহু লোক গুৰুতৰভাৱে আহত হোৱা বুলি জানিব পৰা গৈছে। বিস্ফোৰণটো ইমানেই জোৰেৰে হৈছিল যে ১ কিলোমিটাৰ দূৰলৈকে ইয়াৰ শব্দ শুনা গৈছিল, যাৰ ফলত চাৰিওফালৰ অঞ্চলত আতংকৰ সৃষ্টি হয়।
এই দুৰ্ঘটনা সন্দৰ্ভত লক্ষ্ণৌৰ ডি এম বিশাক জীয়ে কয় যে, আৰক্ষীৰ দল, জৰুৰীকালীন সঁহাৰি, এছ ডি আৰ এফৰ দল সেই স্থানত উপস্থিত হৈছে। দুজন লোকৰ মৃত্যু হৈছে আৰু ৫জন লোক আহত হোৱাৰ খবৰ পোৱা গৈছে। বিস্ফোৰণৰ কাৰণ আৰু অন্যান্য বিষয় জানিবলৈ আৰক্ষী আৰু অগ্নিনিৰ্বাপক বাহিনীৰ দল ইয়াত উপস্থিত হৈছে।
ডি এম গৰাকীয়ে জানিবলৈ দিয়া মতে আহত তিনিজনক চিকিৎসাৰ অন্তত ঘৰলৈ যাবলৈ দিয়াৰ বিপৰীতে গুৰুতৰভাৱে আহত দুজনক উন্নত চিকিৎসাৰ বাবে কে জি এম ইউলৈ প্ৰেৰণ কৰা হৈছে। ঘটনাস্থলীত উপস্থিত হৈছে আৰক্ষী আৰু এছডিআৰএফ। যিটো অট্টালিকাত বিস্ফোৰণ সংঘটিত হৈছিল সেই অট্টালিকাটো সম্পূৰ্ণৰূপে ধ্বংস হোৱাৰ লগতে ইয়াৰ আশে-পাশে থকা অট্টালিকাসমূহো ক্ষতিগ্ৰস্ত হৈছে। অগ্নিনিৰ্বাপক বাহিনীৰ লগতে আৰক্ষীৰ দলে বিস্ফোৰণৰ কাৰণৰ তদন্ত অব্যাহত ৰাখিছে। বিডিডিৰ দল আৰু অগ্নিনিৰ্বাপক বাহিনীৰ দলে বিস্ফোৰণৰ কাৰণ জানিবলৈ প্ৰমাণ সংগ্ৰহ কৰি আছে।
