অসমীয়াত এশাৰী কথা আছে ‘যিয়ে ধেমালি নুবুজে, তেওঁৰ লগত ধেমালি নকৰিবা’। স্বামীয়ে কৰা এক ধেমালিৰ বাবেই এখন সংসাৰত লাগিল আউল। পত্নীয়ে শেষ কৰিলে নিজৰ জীৱন।
উত্তৰ প্ৰদেশৰ ৰাজধানী লক্নৌৰ ইন্দিৰানগৰ থানা এলেকাত ২৮ বছৰীয়া মডেল তন্নু সিঙে আ**ত্যা কৰাৰ অভিযোগ উত্থাপন হৈছে। পৰিয়ালে দাবী কৰা মতে, তেওঁৰ স্বামী ৰাহুল সিঙে ধেমালিতে তেওঁক “বান্দৰী” বুলি অভিহিত কৰিছিল, যাৰ বাবে তেওঁ মনত যথেষ্ট আঘাত পাইছিল। আৰক্ষীয়ে মৰণোত্তৰ পৰীক্ষা কৰি মৃতদেহ পৰিয়ালক গতাই দিয়ে যদিও বৰ্তমানলৈকে কোনো লিখিত অভিযোগ দাখিল কৰা হোৱা নাই।
এই গোচৰৰ তদন্ত অব্যাহত আছে। আৰক্ষীৰ মতে, তন্নু সিং স্বামী ৰাহুল সিঙৰ সৈতে ইন্দিৰানগৰ ছেক্টৰ ১৪ত বাস কৰিছিল। তন্নু সিং মডেলিং ক্ষেত্ৰখনত সক্ৰিয় আছিল আৰু এই পেছাটোৰ প্ৰতি অতি সংবেদনশীল আছিল। তন্নুৰ ভগ্নী অঞ্জলিয়ে জনোৱা মতে, বুধবাৰে সন্ধিয়া গোটেই পৰিয়ালটোৱে সীতাপুৰৰ এজন আত্মীয়ৰ ঘৰলৈ গৈছিল আৰু উভতি অহাৰ পিছত ঘৰত একেলগে বহি হাঁহি হাঁহি ধেমালি কৰি আছিল।
সেই সময়তে ৰাহুল সিঙে ধেমালিতে তন্নুক “বান্দৰী” বুলি কৈছিল। এই কথাত তন্নুৱে আঘাত পাই খঙত নিজৰ কোঠালৈ যায়। প্ৰায় এঘণ্টামান পিছত যেতিয়া তেওঁলোকে ৰাতিৰ আহাৰ খাবলৈ তন্নুক মাতে, তেতিয়া কোনো সঁহাৰি নাপায়। চিন্তিত হৈ পৰিয়ালৰ লোকে লৰালৰিকৈ কোঠাটোলৈ গৈ তন্নুৰ মৃতদেহটো চিলিং ফেনত দুপাট্টা লৈ ওলমি থকা অৱস্থাত উদ্ধাৰ কৰে। লগে লগে পৰিয়ালে আৰক্ষীক খবৰ দিয়ে। ঘটনাস্থলীত ইন্দিৰানগৰ আৰক্ষী উপস্থিত হৈ মৃতদেহটো জিম্মাত লৈ মৰণোত্তৰ পৰীক্ষাৰ বাবে প্ৰেৰণ কৰে।
তদন্তকাৰী বিষয়াগৰাকীয়ে কয় যে প্ৰাথমিক তদন্তৰ পৰা অনুমান কৰা হৈছে যে পৰিয়ালৰ বিবাদ বা কৌতুকৰ বাবেই আত্মহত্যা কৰা হৈছে। এতিয়ালৈকে পৰিয়ালটোৱে কোনো লিখিত অভিযোগ দাখিল কৰা নাই। যদি কোনো অভিযোগ পোৱা যায় তেন্তে সেই ভিত্তিত অধিক ব্যৱস্থা গ্ৰহণ কৰা হ’ব। এই ঘটনাত গভীৰভাৱে স্তম্ভিত হৈ পৰিছে তন্নুৰ পৰিয়াল। তেওঁলোকে উল্লেখ কৰিছিল যে তন্নুৱে মডেলিঙৰ প্ৰতি অতি আকৰ্ষিত আছিল।
