শ্ৰীলংকাৰ প্ৰাক্তন ৰাষ্ট্ৰপতি মহিন্দা ৰাজপাক্ষেৰ পুত্ৰক গ্ৰেপ্তাৰ কৰিছে আৰক্ষীয়ে। হঠাত গ্ৰেপ্তাৰ কৰা ঘটনাৰ পিছতে শ্ৰীলংকাৰ ৰাজনীতিত এতিয়া ব্যাপক প্ৰতিক্ৰিয়াৰ সৃষ্টি কৰিছে। জানিব পৰা অনুসৰি, প্ৰাক্তন ৰাষ্ট্ৰপতিগৰাকীৰ পুত্ৰ যোশিতা ৰাজপাকক্ষেক শনিবাৰে আৰক্ষীয়ে এটা সম্পত্তি ক্ৰয়ৰ গোচৰত দুৰ্নীতিৰ অভিযোগত গ্ৰেপ্তাৰ কৰে। এই বিষয়ত তেওঁক জেৰা চলাই থকা হৈছে।
উল্লেখ্য যে, মহিন্দা ৰাজপাক্ষেৰ পুত্ৰ পূৰ্বে নৌসেনাৰ এগৰাকী বিষয়াৰূপে কৰ্মৰত আছিল। নৌসেনাৰ প্ৰাক্তন বিষয়া যোশিতাক বেলিএট্টাস্থিত নিজ বাসগৃহৰ পৰা গ্ৰেপ্তাৰ কৰা হয়।
২০১৫ চনৰ পূৰ্বে পিতৃ ৰাষ্ট্ৰপতি হৈ থকাৰ সময়ত সম্পত্তি ক্ৰয়ৰ অভিযোগৰ তদন্তৰ পিছতে তেওঁক গ্ৰেপ্তাৰ কৰা হয়। মহিন্দ ৰাজপাক্ষেৰ তিনি পুত্ৰৰ ভিতৰত যোশিতা দ্বিতীয় পুত্ৰ।
যোশিতাৰ খুড়াক তথা প্ৰাক্তন ৰাষ্ট্ৰপতি গোটবায়া ৰাজপাক্ষেকো যোৱা সপ্তাহত একেটা গোচৰতে আৰক্ষীয়ে জেৰা কৰিছিল। মহিন্দ ৰাজপাক্ষেই শুকুৰবাৰে উচ্চতম ন্যায়ালয়ত মৌলিক অধিকাৰৰ আৱেদন দাখিল কৰি তেওঁৰ নিৰাপত্তা পুনৰ ঘূৰাই অনাৰ বাবে আদালতৰ হস্তক্ষেপ বিচৰাৰ পিছতে এই গ্ৰেপ্তাৰ কৰা হৈছে।
উল্লেখ্য যে, যোৱা মাহত শ্ৰীলংকা চৰকাৰে তেওঁৰ নিৰাপত্তা বহু পৰিমাণে হ্ৰাস কৰিছিল।
