প্ৰথমবাৰৰ বাবে দেশৰ ৰাজধানী নতুন দিল্লীৰ ভাৰত মণ্ডপমত দুদিনীয়াকৈ অৰ্থাত ২৩ আৰু ২৪ মে’ত অনুষ্ঠিত হ’ব ‘ৰাইজিং নৰ্থ-ইষ্ট: দ্য ইনভেষ্টৰ্ছ ছামিট ২০২৫’। এই ছামিটৰ লক্ষ্য হৈছে উত্তৰ-পূব অঞ্চলত বিনিয়োগ আৰু বাণিজ্যিক সম্ভাৱনা প্ৰদৰ্শন।
ড’নাৰ মন্ত্ৰালয়ৰ উদ্যোগত এফআইচিচিআই আৰু ইনভেষ্ট ইণ্ডিয়াৰ সৈতে মিলি আয়োজন কৰা এই সন্মিলনখন উদ্বোধন কৰিব প্ৰধানমন্ত্ৰী নৰেন্দ্ৰ মোদীয়ে। এই সন্মিলনৰ লক্ষ্য হৈছে অঞ্চলটোৰ ভূ-কৌশলগত সুবিধা, প্ৰচুৰ প্ৰাকৃতিক সম্পদ, দক্ষ কৰ্মশক্তি, আৰু উত্তৰ-পূব আৰু চুবুৰীয়া দেশসমূহৰ বজাৰত প্ৰৱেশৰ ওপৰত আলোকপাত কৰা।
শীৰ্ষ সন্মিলনৰ প্ৰাকমুহূৰ্তত ভাৰতৰ সাতখন ডাঙৰ চহৰত ৰোডশ্ব’ৰ আয়োজন কৰা হৈছিল যাতে উত্তৰ-পূব অঞ্চলৰ বিনিয়োগৰ সম্ভাৱনা প্ৰদৰ্শন কৰা হয় আৰু সম্ভাৱ্য বিনিয়োগকাৰীৰ কাষ চাপিব পৰা যায়।
এই সন্মিলনত অসমৰ উচ্চপদস্থ বিষয়াৰে গঠিত এক উচ্চ পৰ্যায়ৰ প্ৰতিনিধি দলে নিজৰ সবল উপস্থিতি প্ৰকাশ কৰিব। এখন মুখ্য ৰাজ্য আৰু উত্তৰ-পূবৰ দুৱাৰমুখ হোৱাৰ বাবে অসমে সন্মুখৰ পৰা নেতৃত্ব দি অসমৰ মুখ্যমন্ত্রী ড০ হিমন্ত বিশ্ব শর্মাই মূল খণ্ডৰ লগতে উদীয়মান খণ্ডতো নিজৰ অন্তর্নিহিত শক্তি প্রদর্শন কৰিব৷
