দেওবাৰে পুৱা ওড়িশাৰ কোৰাপুট জিলাত এখন বাছ দুৰ্ঘটনাত পতিত হোৱাত চাৰিজন যাত্ৰী নিহত হোৱাৰ লগতে ৪০ জন আহত হয়। আৰক্ষীয়ে এই তথ্য প্ৰদান কৰে।
আৰক্ষীয়ে জনোৱা মতে, বয়পাৰিগুডা থানা এলেকাৰ গুপ্তেশ্বৰৰ সমীপৰ ডোকৰিঘাটত পুৱা প্ৰায় ৫.৩০ বজাত এই দুৰ্ঘটনা সংঘটিত হয়। কটকৰ নিয়ালিৰ পৰা প্ৰায় ৫০ জন ভক্তক লৈ বাছখন গুপ্তেশ্বৰ মন্দিৰলৈ গৈ থকা বুলি তেওঁ জানিবলৈ দিয়ে।
সীমান্ত সুৰক্ষা বাহিনী (বি এছ এফ) আৰু আৰক্ষীয়ে আহত যাত্ৰীকেইজনক উদ্ধাৰ কৰি বয়পাৰিগুডা চিকিৎসালয়ত ভৰ্তি কৰোৱা বুলি এগৰাকী বিষয়াই জানিবলৈ দিয়ে।
বাছখনৰ চালকজনে নিয়ন্ত্ৰণ হেৰুওৱাৰ ফলতেই এই দুৰ্ঘটনাটো সংঘটিত হোৱাৰ আশংকা প্ৰকাশ কৰিছে আৰক্ষীয়ে। জানিব পৰা অনুসৰি, নিহতসকলৰ ভিতৰত এটা ১২ বছৰীয়া শিশুও আছে। আহতসকলৰ বহুতৰে অৱস্থা সংকটজনক বুলি জানিব পৰা গৈছে।
ইফালে ওড়িশাৰ মুখ্যমন্ত্ৰী চৰণ মাঝীয়ে এই কৰুণ ঘটনাটোত শোক প্ৰকাশ কৰি মৃতকৰ পৰিয়াললৈ সমবেদনা জ্ঞাপন কৰাৰ লগতে ২-২ লাখ টকাকৈ আৰ্থিক সাহায্য প্ৰদান কৰাৰ কথা ঘোষণা কৰে।
