পেৰিছ অলিম্পিকৰ চতুৰ্থ দিনটোত ভাৰতীয় শ্বুটাৰ মনু ভাকৰ আৰু সৰবজোৎ সিঙে ১০ মিটাৰ এয়াৰ পিষ্টল মিক্সড ইভেণ্টত ব্ৰঞ্জ পদক অৰ্জন কৰি ইতিহাস ৰচিবলৈ সক্ষম হয়।
এই পদক জয়ৰ লগে লগে মনু ভাকৰে গঢ়িলে এক অনন্য অভিলেখ। একেটা অলিম্পিকত দুটা পদক জয় কৰা একমাত্ৰ ভাৰতীয় এথলীটৰূপে পৰিগণিত হ’ল মনু ভাকৰ।
দ্বিতীয়টো পদক জয় কৰাৰ পিছতে সংবাদ মাধ্যমৰ আগত প্ৰতিক্ৰিয়া প্ৰকাশ কৰি মনু ভাকৰে কয় যে সঁচাকৈয়ে গৌৰৱ অনুভৱ কৰিছো আৰু বহুত কৃতজ্ঞতা… এয়া মাথো আশীৰ্বাদ। সকলো আশীৰ্বাদ আৰু মৰমৰ বাবে ধন্যবাদ।
উল্লেখ্য যে ইয়াৰ পূৰ্বে পেৰিছ অলিম্পিকত ভাৰতৰ প্ৰথমটো পদকো নিশ্চিত কৰিছিল মনু ভাকৰে। এয়াৰ পিষ্টলত ভাৰতীয় খেলুৱৈ মনু ভাকৰে ব্ৰঞ্জৰ পদক লাভ কৰিবলৈ সক্ষম হৈছিল।
পদক নিশ্চিত হোৱাৰ পিছতে মনু ভাকৰে অলিম্পিকত এয়াৰ পিষ্টলত পদক জয় কৰা প্ৰথমগৰাকী ভাৰতীয় খেলুৱৈ হিচাপে অভিলেখ গঢ়িবলৈ সক্ষম হৈছিল।
স্মৰ্তব্য যে পেৰিছ অলিম্পিকত ভাৰতে এই পৰ্যন্ত দুটা পদক লাভ কৰিবলৈ সক্ষম হৈছে।
