মঙলবাৰে মণিপুৰৰ ৰাজধানী ইম্ফলত সশস্ত্ৰ বাহিনী (বিশেষ ক্ষমতা) আইন আৰু বিগত বৰ্ষৰ মে’ মাহৰ পৰা ৰাজ্যখনত চলি থকা অস্থিৰ পৰিৱেশৰ বিৰুদ্ধে এক বৃহৎ ৰেলী অনুষ্ঠিত হয়।
গান্ধী স্মাৰক প্ৰেক্ষাগৃহৰ মাজেৰে সমদল উলিওৱা এই সমাৱেশৰ সামৰণি পৰে ইম্ফল পূৱৰ খুমান লম্পক মূল ষ্টেডিয়ামত। এই পথত অংশগ্ৰহণকাৰীসকলে ‘মণিপুৰ নিঃশেষ নকৰিব’, ‘আফস্পা বাতিল কৰক’, ‘মণিপুৰ দীৰ্ঘায়ু’ আৰু ‘আত্মনিয়ন্ত্ৰণ আমাৰ জন্মগত অধিকাৰ’ আদি শ্লোগানেৰে উত্তাল কৰি তোলে।
আমুকো, পইৰেই লেইমাৰল, আমাৱ’ভা, চিভিল ছ’চাইটি ক’লিচন ফৰ হিউমেন ৰাইটছ (চিঅ’এইচআৰ) আৰু মণিপুৰ ষ্টুডেণ্টছ ফেডাৰেচন (এমএছএফ)ৰ যৌথ উদ্যোগত এই বিক্ষোভৰ আয়োজন কৰা হয়।
এই সমাৱেশৰ সময়ত যাতে কোনো ধৰণৰ অপ্ৰীতিকৰ পৰিস্থিতিৰ সৃষ্টি নহয় তাৰ বাবে মণিপুৰ আৰক্ষী আৰু কেন্দ্ৰীয় নিৰাপত্তা বাহিনীয়ে ইম্ফলৰ ৰাজভৱনলৈ যোৱা পথৰ কাষত বেৰিকেড স্থাপন কৰে।
অল মণিপুৰ ইউনাইটেড ক্লাবছ অৰ্গেনাইজেশ্যনৰ সভাপতি পি নাণ্ডো লুৱাঙে অভিযোগ কৰে যে মণিপুৰত চলি থকা অস্থিৰতাকে ধৰি কিছুমান সম্প্ৰদায়ভিত্তিক সশস্ত্ৰ সংগঠনক মিছা প্ৰতিশ্ৰুতি দি হিংসাত্মক পৰিস্থিতিৰ উচটনি দিয়াৰ বাবে নতুন দিল্লী দায়ী।
উল্লেখ্য যে, বিগত বৰ্ষৰ মে’ মাহৰ পৰা মণিপুৰত মেইটেই আৰু কুকি জনগোষ্ঠীৰ মাজত সংঘৰ্ষ আৰম্ভ হৈছিল আৰু এই সংঘৰ্ষৰ ফলত ৰাজ্যখন অস্থিৰ হৈ পৰাৰ লগতে বহু লোকে প্ৰাণ হেৰুওৱাৰ উপৰি আন বহু লোক গৃহহীন হৈ পৰিছে।
