কেৰালাত মাঙ্কি পক্সৰ দ্বিতীয়টো ৰোগী ধৰা পৰিছে। মাঙ্কি পক্সৰ উপস্থিতি ধৰা পৰা দেশৰ এইটো তৃতীয়টো ঘটনা। শেহতীয়া ধৰা পৰা ব্যক্তিজন কেৰালাৰ এৰ্নাকুলামৰ বাসিন্দা। কেৰালা স্বাস্থ্য বিভাগৰ সূত্ৰ অনুসৰি ব্যক্তিজনৰ অৱস্থা সুস্থিৰ আৰু চিকিৎসালয়ত চিকিৎসাধীন হৈ আছে।
ডুবাইৰ পৰা কেৰালালৈ উভতি অহাৰ পিছতে ব্যক্তিজনৰ দেহত মাঙ্কি পক্সৰ উপস্থিতি ধৰা পৰা বুলি জানিব পৰা গৈছে।
ইয়াৰ পূৰ্বে ডুবাইৰ পৰা কেৰালালৈ উভতি অহা আন এজন ব্যক্তি মাঙ্কি পক্সত আক্ৰান্ত হোৱা দেখা গৈছিল। ৩৮ বছৰীয়া যুৱকজন মালাপ্পুৰম জিলাত চিকিৎসাধীন হৈ আছে। একে সময়তে যোৱা ৯ ছেপ্টেম্বৰত দেশত প্ৰথমজন মাঙ্কি পক্স ৰোগী ধৰা পৰে।
কেন্দ্ৰীয় স্বাস্থ্য মন্ত্ৰালয়ে জনাইছিল যে বিদেশৰ পৰা উভতি অহা এজন ব্যক্তিক মাঙ্কি পক্সৰ সন্দেহত ৮ ছেপ্টেম্বৰত আইছ’লেশ্যনত ৰখা হৈছিল।
কেন্দ্ৰীয় চৰকাৰে জাৰি কৰিছে পৰামৰ্শ
কেন্দ্ৰীয় স্বাস্থ্য মন্ত্ৰালয়ে মাঙ্কি পক্স নিয়ন্ত্ৰণৰ বাবে ৰাজ্যসমূহলৈ এক পৰামৰ্শ জাৰি কৰিছে। কেন্দ্রীয় চৰকাৰে কয় যে ৰাজ্যসমূহে মাঙ্কি পক্সৰ সংক্রমণ যাতে নহয় তাৰ বাবে যাৱতীয় ব্যৱস্থা গ্ৰহণ কৰিব লাগে৷
উল্লেখ্য যে, বিশ্ব স্বাস্থ্য সংস্থাই ১৪ আগষ্টত মাঙ্কি পক্সক বিশ্বজনীন জনস্বাস্থ্য জৰুৰীকালীন অৱস্থা হিচাপে ঘোষণা কৰে। দুবছৰৰ ভিতৰত দ্বিতীয়বাৰৰ বাবে মাঙ্কি পক্স সন্দৰ্ভত বিশ্ব স্বাস্থ্য সংস্থাই জৰুৰীকালীন অৱস্থা ঘোষণা কৰিছে।
