সুপ্ৰভাত। দিনটোৰ আৰম্ভণিতেই কেইটামান গুৰুত্বপূৰ্ণ খবৰেৰে আৰম্ভ কৰিছো ৰাতিপুৱাৰ এই শিতানটো।
- মঙলবাৰে নিশা তুৰস্কৰ ৰাজধানী আংকাৰাত ভয়ংকৰ বিমান দুৰ্ঘটনা। এই দুৰ্ঘটনাত পতিত হয় ফাল্কন-৫০ নামৰ ব্যৱসায়িক বিমান। লিবিয়াৰ শীৰ্ষ সামৰিক বিষয়া জেনেৰেল মহম্মদ আলী আহমেদ আল হাদ্দাদকে ধৰি ৮ জনৰ প্ৰাণহানি এই দুৰ্ঘটনাত। ইতিমধ্যে কাৰিকৰী সমস্যাৰ বাবে এই দুৰ্ঘটনা সংঘটিত হৈছিল বুলি জানিব পৰা গৈছে।
- বৰ্তমানেও শান্ত হোৱা নাই পশ্চিম কাৰ্বি আংলং। ২৩ ডিচেম্বৰত প্ৰতিবাদকাৰী আৰু আৰক্ষীৰ মাজত তীব্ৰ হতাহতি হয়। পুনৰ দোকান-পোহাৰত অগ্নি সংযোগ কৰে প্ৰতিবাদকাৰীয়ে। আকৌ পশ্চিম কাৰ্বি আংলঙত ইণ্টাৰনেট সেৱাও কৰ্তন কৰা হয়। কাৰ্বি ভূমিত অনা কাৰ্বি লোকে দখল কৰাক লৈ এই পৰিস্থিতিৰ সৃষ্টি হয়।ইফালে এই পৰিস্থিতিৰ মাজতে খেৰণিত আৰক্ষীৰ গুলীত নিহত এজন প্ৰতিবাদকাৰী। নিহত প্ৰতিবাদকাৰীজন হৈছে ছিংথু টিমুং। প্ৰতিবাদ নিয়ন্ত্ৰণহীন হৈ পৰাৰ বাবে আৰক্ষীয়ে চলাইছিল গুলী।
- উত্তৰ প্ৰদেশৰ ফিৰোজাবাদত সংঘটিত হয় শোকাৱহ পথ দুৰ্ঘটনা। ফিৰোজাবাদৰ ছিৰছাগঞ্জ থানা এলেকাত আগ্ৰা-লক্ষ্ণৌ এক্সপ্ৰেছৱে’ত চলন্ত বাছত হঠাতে অগ্নি সংযোগ হৈ দুৰ্ঘটনা সংঘটিত হয়। জানিব পৰা মতে, বাছখনৰ টায়াৰ ফাটি যোৱাৰ পিছত হঠাতে শ্বৰ্ট চাৰ্কিট সংঘটিত হৈ অগ্নিকাণ্ড সংঘটিত হয়। এই ঘটনাৰ পিছতে বাছখনৰ যাত্ৰীসকলে জপিয়াই নিজৰ প্ৰাণ ৰক্ষা কৰে।
- আমেৰিকাৰ যুদ্ধ জাহাজসমূহৰ যেন ম্যাদ উকলিবলৈ আৰম্ভ হোৱাত নতুন ধৰণৰ যুদ্ধ জাহাজ নির্মাণ কৰিবলৈ ওলাইছে আমেৰিকাই। প্ৰচুৰ অস্ত্র-শস্ত্র বহন কৰিব পৰা এই যুদ্ধ জাহাজসমূহক ট্রাম্প শ্ৰেণীৰ বুলি ঘোষণা কৰে মার্কিন প্রেচিডেন্ট ড’নাল্ড ট্রাম্পে। তেওঁ জানিবলৈ দিয়া মতে, মুখ্যতঃ দুখন নতুন যুদ্ধ জাহাজ নির্মাণত অনুমতি প্রদান কৰিছে তেওঁ। আগন্তুক দিনত ২০-২৫খন যুদ্ধ জাহাজ নির্মাণৰ পৰিকল্পনা আছে বুলিও তেওঁ প্রকাশ কৰে। এই নতুন ধৰণৰ যুদ্ধ জাহাজসমূহক বৃহত্তৰ, দ্রুততৰ আৰু সাধাৰণ মার্কিন যুদ্ধ জাহাজতকৈ ১০০ গুণ বেছি শক্তিশালী হ’ব বুলি তেওঁ মন্তব্য কৰে।
- শেহতীয়াকৈ ঘূর্ণি বতাহ দিটৱাহত বিধ্বস্ত হৈ পৰা শ্ৰীলংকাৰ বহু ঠাইৰ লগত যোগাযোগ বিচ্ছিন্ন হৈ পৰে। শতাধিক লোকে হেৰুৱাই নিজৰ প্ৰাণ। এনে বিপৰ্যয়ৰ সময়ত চুবুৰীয়া ৰাষ্ট্ৰ শ্রীলংকাৰ ওচৰত থিয় দিছে ভাৰতে। দ্বীপ ৰাষ্ট্ৰখনলৈ সাহায্য অগবঢ়াই ‘অপাৰেচন সাগৰ বন্ধু’ আৰম্ভ কৰে নতুন দিল্লীয়ে। চি-১৩০ আৰু আই এল-৭৬ বিমানেৰে অর্ধসামৰিক বাহিনীৰ দল পঠিওৱাৰ লগতে জি ৰাষ্ট্ৰখনলৈ পঠিওৱা হৈছে সাহায্য সামগ্রীও। তাৰ লগতে ৪৫০ মিলিয়ন ডলাৰ মূল্যৰ সাহায্য পেকেজৰ প্রস্তাৱো আগবঢ়োৱা হৈছে। সম্প্রতি প্রধানমন্ত্রী নৰেন্দ্ৰ মোদীৰ বিশেষ দূত হিচাপে শ্রীলংকাত দুদিনীয়া ভ্রমণসূচীৰে উপস্থিত হৈছে বিদেশ মন্ত্রী এছ জয়শংকৰ।
