পুৱাৰ কেইটামান গুৰুত্বপূৰ্ণ খবৰেৰে আজিৰ দিনটো

সুপ্ৰভাত। সকলোলৈ ইংৰাজী নৱবৰ্ষৰ অলেখ- অযুত শুভকামনা থাকিল। নতুন বছৰটো সকলোৰে বাবে মংগলময় হওক। দিনটোৰ আৰম্ভণিতেই কেইটামান গুৰুত্বপূৰ্ণ খবৰেৰে আৰম্ভ কৰিছো ৰাতিপুৱাৰ এই শিতানটো।

• নিশাৰ প্ৰচুৰ কুঁৱলীৰ অন্তত পুৱাৰ ৰৌদ্ৰোজ্বল পোহৰেৰে লগতে ন-উদ্যম, ন-প্ৰত্যাশাৰে শুভাৰম্ভণি ২০২৬ৰ । সম্ভাৱনা, আশা আৰু জীয়াই থকাৰ নতুন প্ৰেৰণাৰে আহিছে ২০২৬ চন। আজি পহিলা জানুৱাৰী। ইয়াকে লৈ বিভিন্নজনৰ নতুন প্ৰস্তুতি।নতুন বছৰটোৱে সকলোৰে জীৱনলৈ কঢ়িয়াই আনক নতুন আশা, নতুন প্ৰত্যাশা তথা নতুন সম্ভাৱনা। নেতিবাচক সকলো ঘটনা-পৰিঘটনা পাহৰি ইতিবাচকভাবে আৰম্ভণি হওক নতুন বছৰটোৰ। পুৰণি দুখ-কষ্ট আঁতৰাই নতুন আশাৰে আগবাঢ়ি যাওঁক সকলো। আহিবলগীয়া দিনকেইটাই সকলোৰে জীৱনলৈ কঢ়িয়াই আনক সুখ, শান্তি আৰু সমৃদ্ধি।
• বছৰৰ প্ৰথম দিনটোতে বাঢ়িল চিলিণ্ডাৰৰ মূল্য। বৃদ্ধি পালে LPGৰ দাম। ১৯ কিলোগ্ৰামৰ বাণিজ্যিক চিলিণ্ডাৰৰ দাম ১১১ টকাকৈ বৃদ্ধি হ’ব। ১ জানুৱাৰীৰ পৰা কাৰ্যকৰী হ’ব এই ডাঙৰ সিদ্ধান্ত। অৱশ্যে বৰ্তমানেলৈ সলনি হোৱা নাই ঘৰুৱা চিলিণ্ডাৰৰ মূল্য।
• আজি সমগ্ৰ দেশৰ লগতে সমগ্ৰ বিশ্বতে নৱবৰ্ষ উদযাপনৰ আয়োজন কৰা হৈছে। ৰাজধানী দিল্লীৰ উপৰিও মুম্বাই, বেংগালুৰু, লক্ষ্ণৌকে ধৰি ডাঙৰ ডাঙৰ চহৰতো নতুন বছৰ উদযাপন কৰা হৈছে। এই উপলক্ষে প্ৰধানমন্ত্ৰী নৰেন্দ্ৰ মোদীকে ধৰি কেইবাজনো শীৰ্ষ নেতাই ২০২৬ বৰ্ষৰ বাবে শুভেচ্ছা জ্ঞাপন কৰে। ২০২৬ৰ নৱবৰ্ষৰ বাবে দেশবাসীলৈ শুভেচ্ছা জ্ঞাপন কৰি মোদীয়ে সামাজিক মাধ্যমত কয় যে, আগন্তুক বছৰে আপোনালোকৰ বাবে সুস্বাস্থ্য আৰু সমৃদ্ধি কঢ়িয়াই আনক। সকলোৱে নিজৰ প্ৰচেষ্টাত সফলতা লাভ কৰক আৰু সকলোৰে সকলো কাম পূৰ্ণ হওক।
• নৱবৰ্ষৰ পূৰ্বে ৰাছিয়াৰ ৰাষ্ট্ৰপতি ভ্লাদিমিৰ পুটিনে ইউক্ৰেইন যুদ্ধ সন্দৰ্ভত এক বৃহৎ বক্তব্য আগবঢ়ায়। ২০২৬ চনৰ আগমনৰ সময়ত দেশখনক সম্বোধন কৰি পুটিনে ইউক্ৰেইনত ৰাছিয়াৰ “চূড়ান্ত জয়”ৰ ওপৰত সম্পূৰ্ণ আস্থা প্ৰকাশ কৰে আৰু নাগৰিকসকলক ৰাছিয়াৰ সৈন্যক সমৰ্থন কৰিবলৈ আহ্বান জনায়। পুটিনৰ ভাষণ প্ৰথমে ৰাছিয়াৰ সুদূৰ পূব অঞ্চল কামচাটকা উপদ্বীপত সম্প্ৰচাৰিত হৈছিল, য’ত ২০২৬ চনৰ আগমন উদযাপন কৰা হৈছিল। ইয়াৰ পিছতে দেশৰ অন্যান্য অঞ্চলতো এই বাৰ্তা সম্প্ৰচাৰ কৰা হয়।
• এগৰাকী নৌসেনা বিষয়াৰ ১৮ বছৰীয়া কন্যাই স্কিইং কৰি দক্ষিণ মেৰুত উপনীত হোৱা আটাইতকৈ কম বয়সীয়া ভাৰতীয় নাগৰিক হোৱাৰ গৌৰৱ অৰ্জন কৰিছে। যুৱতীগৰাকীৰ নাম কাম্যা কাৰ্তিকেয়ান। মঙলবাৰে নৌসেনাই এই তথ্য প্ৰদান কৰে। ভাৰতীয় নৌসেনাই কাম্যা কাৰ্তিকেয়ানক সামাজিক মাধ্যমযোগে অভিনন্দন জনাইছে। –৩০ ডিগ্ৰী চেলছিয়াছ আৰু গেল-ফৰ্চ বতাহৰ পৰা সাহস কৰি কাম্যাই ৮৯ ডিগ্ৰী দক্ষিণৰ পৰা প্ৰায় ৬০ নটিকেল মাইল (প্ৰায় ১১৫ কিলোমিটাৰ) দূৰত্ব অতিক্ৰম কৰি ২৭ ডিচেম্বৰত দক্ষিণ মেৰুত উপস্থিত হয়।