দিল্লীৰ মুস্তাফাবাদ অঞ্চলৰ শক্তি বিহাৰত সংঘটিত হৈছে ভয়ংকৰ দুৰ্ঘটনা। শনিবাৰে পুৱাৰ ভাগত এটা চাৰিমহলীয়া অট্টালিকা ভাঙি পৰাৰ ফলত ১১ জন লোকৰ মৃত্যু হোৱাৰ লগতে আন কেইবাগৰাকীও লোক গুৰুতৰভাৱে আহত হয়।
এই ঘটনাটোৰ পিছৰে পৰা অঞ্চলবাসীৰ মাজত আতংকময় পৰিৱেশে বিৰাজ কৰা পৰিলক্ষিত হয়। ইফালে এম ছি ডি মেয়ৰ মহেশ খীচীয়ে দোষী বিষয়াসকলৰ বিৰুদ্ধে তদন্ত কৰাৰ নিৰ্দেশ প্ৰদান কৰিছে।
ইফালে মোহন সিং বিষ্টে দোষী বিষয়াসকলৰ বিৰুদ্ধে কঠোৰ পদক্ষেপ গ্ৰহণ কৰিবলৈ দিল্লী চৰকাৰক দাবী জনায়। বিধানসভাত এইধৰণৰ অবৈধ অট্টালিকাৰ বিৰুদ্ধে ব্যৱস্থা গ্ৰহণৰ বাবে দাবী উত্থাপন কৰা হৈছিল বুলিও তেওঁ কয়।
বিধায়কগৰাকীয়ে কয়, ‘নিৰ্বাচনত জয়ী হোৱাৰ দিনৰে পৰা মোৰ একমাত্ৰ লক্ষ্য হৈছে অবৈধ অট্টালিকাৰ বিৰুদ্ধে ব্যৱস্থা লোৱা। যদি ২৫ বা ৫০ গজৰ এটা অট্টালিকাত শ শ লোকে বাস কৰি আছে, তেন্তে দুৰ্ঘটনা হোৱাটো নিশ্চিত আছিল। এই সন্দৰ্ভত দিল্লীৰ উপ-ৰাজ্যপাল, আয়ুক্ত আৰু আৰক্ষী আয়ুক্তৰ সৈতে আলোচনা কৰিছো, কিন্তু আজিলৈকে কোনো ব্যৱস্থা গ্ৰহণ কৰা হোৱা নাই।’
আনহাতে দিল্লীৰ মুখ্যমন্ত্ৰী ৰেখা গুপ্তাই এই ঘটনাৰ দুখ প্ৰকাশ কৰি তদন্তৰ ঘোষণা কৰে। তেওঁ কয়, ‘এই দুৰ্ঘটনাত মৃত্যু হোৱাসকলৰ বাবে গভীৰ শোক প্ৰকাশ কৰিছো। ভগৱানে বিদেহী আত্মাক শান্তি দিয়ক। লগতে শোকসন্তপ্ত পৰিয়ালসমূহক এই অপূৰণীয় ক্ষতি সহ্য কৰিবলৈ শক্তি প্ৰদান কৰক।
উল্লেখ্য যে, এই ঘটনাত মৃত্যু হোৱা লোকসকলৰ ভিতৰত কেইবাগৰাকীও শিশু আৰু মহিলা আছে।
