ওড়িশাৰ পুৰীৰ জগন্নাথ মন্দিৰ দৰ্শন কৰাটো এতিয়া দৰ্শনাৰ্থীৰ বাবে সহজ হৈ পৰিব। ইয়াৰ বাবে চৰকাৰে নতুন বছৰৰ পৰা নতুন পদক্ষেপ ল’বলৈ ওলাইছে, যাৰ অধীনত নতুন ব্যৱস্থা ৰূপায়ণ কৰা হ’ব।
দৰ্শনৰ বাবে ভক্তসকলক উন্নত সুবিধা প্ৰদানৰ বাবে পুৰীৰ জগন্নাথ মন্দিৰত নতুন ব্যৱস্থা আৰম্ভ কৰিব। দেওবাৰে এই তথ্য দিলে ৰাজ্যৰ আইন মন্ত্ৰী পৃথ্বীৰাজ হৰিচন্দনে। এই সন্দৰ্ভত হৰিচন্দনে কয় যে, চৰকাৰে ১ জানুৱাৰীৰ পৰা জগন্নাথ মন্দিৰ ভ্ৰমণৰ নতুন ব্যৱস্থা আৰম্ভ কৰিবলৈ পদক্ষেপ গ্ৰহণ কৰিছে।
লগতে তেওঁ কয় যে ২৭ বা ২৮ ডিচেম্বৰৰ ভিতৰত সকলো প্ৰয়োজনীয় কাম সম্পূৰ্ণ হ’ব। পৰীক্ষামূলক ভিত্তিত ৩০ আৰু ৩১ ডিচেম্বৰৰ পৰা দুদিনৰ বাবে এই নতুন ব্যৱস্থা আৰম্ভ কৰা হ’ব। ইয়াৰ পিছতে ১ জানুৱাৰীৰ পৰা অৰ্থাৎ অহা বছৰৰ পৰা নতুন দৰ্শন ব্যৱস্থা সম্পূৰ্ণৰূপে কাৰ্যকৰী হ’ব। এই পদক্ষেপৰ অধীনত মন্দিৰলৈ অহা মহিলা, শিশু, বিশেষভাৱে সক্ষম আৰু জ্যেষ্ঠ নাগৰিকৰ বাবেও বিশেষ ব্যৱস্থা গ্ৰহণ কৰা হৈছে।
এতিয়া এই নতুন ব্যৱস্থা অনুযায়ী ভক্তসকলে জগন্নাথ মন্দিৰত বৰ্তমানৰ দুৱাৰেদি প্ৰৱেশ কৰিব পাৰিব, আনহাতে বাহিৰলৈ ওলাই আহিবলৈ দুখন পৃথক দুৱাৰ থাকিব।
এই সিদ্ধান্ত কেৱল ভক্তসকলৰ সুবিধাৰ্থে গ্ৰহণ কৰা হৈছে। ভক্তসকলে দৰ্শন কৰোঁতে প্ৰায়ে ভিৰৰ সন্মুখীন হ’বলগীয়া হয়। ইয়াৰ বাবেই বহু সময়ত ভক্তসকলে অসুবিধাৰ সন্মুখীন হ’বলগীয়া হয়।
