সমাগত নতুন ২০২৫। মাত্ৰ আৰু কেইটামান মূহুৰ্তৰ পাছতেই আৰম্ভ হ’ব নতুন বছৰৰ। এটা নতুন দিন বা নতুন বছৰ বাবে আমি সকলোৱে আগ্ৰহেৰে বাট চাই আছোঁ। সৌ সিদিনা আৰম্ভ হোৱা বছৰটো একেবাৰে শেষ প্ৰান্তত।
মাজনিশা আকাশ পোঁহৰাই তুলিব আঁতচবাজীয়ে, সকলোৱে নতুন-নতুন সংকল্প ল’ব। নতুন সময় বা নতুন বছৰটো আনন্দেৰে আঁকোৱালি ল’বলৈ আমি সকলোৱে আগ্ৰহেৰে বাট চাই আছোঁ। সময়ৰ এই স্বাভাৱিক আহ্বানৰ মাজেৰে নতুন বছৰ এটা আহি আমাৰ পদূলি মুখত।
এইখিনি পলত ৰৈ সকলোৱে হিচাপ কৰি চাইছে বছৰটোৱে আমাক কি দিলে, আমাক কি নিলে।কিন্তু উল্লাস আৰু উৎসৱৰ মাজতেই নতুন বছৰটো হৈছে চিন্তাৰ সময়, আত্মনিৰীক্ষণৰ সময়, সময়ৰ ক্ষন্তেকীয়া স্বভাৱক স্বীকাৰ কৰাৰ সময়। এনেকৈয়ে আগবাঢ়িছে সময়, এনেকৈয়ে আগবাঢ়িছে বছৰ।
নিজৰ ব্যক্তিগত জীৱনৰ উপৰিও বছৰটোৱে ৰাজ্যখনক সফলতাৰ দিশত কি দিলে সেয়াও গুৰুত্বপূৰ্ণ। কিয়নো ৰাজ্যৰ সামগ্ৰিক উন্নয়নৰ ওপৰত নিৰ্ভৰ কৰে আমাৰ ব্যক্তিগত উন্নতি। সমাজখনৰ উন্নতি হলেহে আমাৰো জীৱন সুৰক্ষিত আৰু সুনিশ্চিত হয়।
আমি আজি আহি যিটো বিন্দুত শেষ উপনীত হৈছো, ঠিক ইয়ৰ পৰাই আৰম্ভ হব এক নতুন যাত্ৰাৰ। পুৰণি বছৰটোতকৈ এইবছৰটো আৰু অধিক ইতিবাচক কামৰ মাজেৰে উদ্ভাষিত হৈ উঠক আমাৰ সকলোৰে জীৱন। নতুন আশা, নতুন প্ৰত্যাশা, নতুন দিগন্তই পোহৰাই তোলক আমাৰ মন-প্ৰাণ সকলো। গতিকে অনাগত সময় সুখৰ হওঁক, সুন্দৰ হওঁক সকলোৰে বাবে।
