ভাৰতৰ ৰাষ্ট্ৰীয় নিৰাপত্তা উপদেষ্টা অজিত ডোভালে বৃহস্পতিবাৰে মস্কোত ৰাছিয়াৰ ৰাষ্ট্ৰপতি ভ্লাডিমিৰ পুটিনক সাক্ষাৎ কৰে। ভাৰত আৰু ৰাছিয়াৰ মাজত শক্তি আৰু প্ৰতিৰক্ষা সহযোগিতা শক্তিশালী কৰাৰ লক্ষ্যৰে এই বৈঠক অনুষ্ঠিত হয়।
বুধবাৰে মস্কোত উপস্থিত হোৱা ডোভালে অতি শীঘ্ৰে পুটিনে ভাৰত ভ্ৰমণ কৰিব পাৰে বুলি ইতিমধ্যে ইংগিত দিছিল।
ইয়াৰ পূৰ্বে ডোভালে ৰাছিয়াৰ নিৰাপত্তা পৰিষদৰ সচিব চাৰ্গেই শ্বোইগুকো সাক্ষাৎ কৰে। শ্বোইগুৱে কয় যে ভাৰত আৰু ৰাছিয়াৰ মাজত “শক্তিশালী আৰু সময়ৰ পৰীক্ষাত” বন্ধুত্বপূৰ্ণ সম্পৰ্ক আছে।
ৰাষ্ট্ৰপতি পুটিন আৰু প্ৰধানমন্ত্ৰী নৰেন্দ্ৰ মোদীৰ মাজত নতুন উচ্চ পৰ্যায়ৰ আলোচনাৰ সময় নিৰ্ধাৰণ কৰাটো দুয়োখন দেশৰ বাবে গুৰুত্বপূৰ্ণ বুলিও তেওঁ অভিহিত কৰে।
ৰাছিয়াৰ নিৰাপত্তা পৰিষদৰ সচিবগৰাকীয়ে লগতে কয় যে দুয়োখন দেশেই আধুনিক যুগৰ প্ৰত্যাহ্বান আৰু ভাবুকিৰ সৈতে যৌথভাৱে মোকাবিলা কৰিবলৈ প্ৰতিশ্ৰুতিবদ্ধ। ভাৰত আৰু ৰাছিয়া কেইবা দশক ধৰি নিৰাপত্তা, প্ৰতিৰক্ষা, শক্তি আৰু প্ৰযুক্তিগত খণ্ডত ইজনে সিজনৰ লগত কৌশলগতভাৱে জড়িত হৈ আছে।
