বৰ্তমান সময়ত আমাৰ জীৱনশৈলীয়ে স্বাস্থ্যৰ ক্ষেত্ৰত যথেষ্ট পৰিবৰ্তন আনিছে। পিছে অসুস্থ হৈ চিকিৎসালয়লৈ লৰালৰিকৈ যোৱাৰ পৰিৱৰ্তে মানুহে বেমাৰ প্ৰতিৰোধৰ ওপৰত অধিক গুৰুত্ব দিয়াটো দৰকাৰ। অৱশ্যে এই মানসিকতা ভাৰততো দ্ৰুতগতিত বৃদ্ধি পোৱা দেখা গৈছে। যাৰফলত নিউট্ৰাচিউটিকেল বজাৰৰ জন্ম হৈছে।
ইয়াৰ ফলত এই প্ৰশ্ন উত্থাপন হৈছে যে ঔষধতকৈ নিউট্ৰাচিউটিকেল অধিক ফলপ্ৰসূ বুলি প্ৰমাণিত নেকি? জানো আহক প্ৰতিৰোধমূলক স্বাস্থ্যসেৱাৰ নতুন ধাৰাটোৰ বিষয়ে-
নিউট্ৰাচিউটিকেল সামগ্ৰী হৈছে এনে সামগ্ৰী যিয়ে শৰীৰত পুষ্টি আৰু ঔষধি উপকাৰীতা প্ৰদান কৰে, যেনে ভিটামিন পৰিপূৰক, প্ৰ’বায়’টিক, বনৌষধিজাত সামগ্ৰী। এগৰাকী স্বাস্থ্য বিশেষজ্ঞই কয় যে এই খণ্ডৰ ভৱিষ্যতৰ সম্ভাৱনা ঔষধতকৈ কমেও দহগুণ বেছি হ’ব পাৰে। কাৰণ সাধাৰণতে অসুস্থতাৰ পিছত ঔষধ গ্ৰহণ কৰা হয়, আনহাতে স্বাস্থ্য ৰক্ষা আৰু ৰোগ প্ৰতিৰোধৰ বাবে নিউট্ৰাচিউটিকেল দৈনিক ব্যৱহাৰ কৰা হয়।
ভাৰতৰ ইনফৰ্মা মাৰ্কেটৰ এম ডি যোগেশ মুদ্ৰাছৰ মতে ভাৰতত এই ধাৰাটোৰ আঁৰত দুটা ডাঙৰ কাৰণ আছে। প্ৰথমটো হ’ল বৃদ্ধৰ সংখ্যা বৃদ্ধি আৰু দ্বিতীয়টো হ’ল যুৱক-যুৱতীসকলৰ পৰিৱৰ্তিত জীৱনশৈলী। অনুমান কৰা হৈছে যে ২০৫০ চনৰ ভিতৰত ভাৰতৰ বৃদ্ধ জনসংখ্যা ৩৪৭ নিযুত হ’ব, যাৰ বাবে শক্তি আৰু উন্নত হজম শক্তিৰ বাবে বিশেষ পুষ্টিৰ প্ৰয়োজন হ’ব। ইফালে ২৫ৰ পৰা ৪৫ বছৰৰ ভিতৰৰ যুৱক-যুৱতীসকলে এতিয়া পৰিপূৰক খাদ্যক নিজৰ দৈনন্দিন জীৱনৰ অংশ হিচাপে গঢ়ি তুলিছে। প্ৰায় ৩৫% মধ্যবিত্ত শ্ৰেণীয়ে এতিয়া নিজৰ দৈনন্দিন সুস্থতাৰ বাবে খৰচ কৰিবলৈ ইচ্ছুক।
এই খণ্ডৰ গুৰুত্ব স্বীকাৰ কৰি ভাৰত চৰকাৰে উল্লেখযোগ্য বিনিয়োগ কৰিছে। জৈৱ ঔষধ উদ্যোগৰ বাবে ১০,০০০ কোটি টকা আবণ্টন দিয়া হৈছে, যিটো অহা পাঁচ বছৰত (২০২৬-২০৩১) ব্যয় কৰা হ’ব। ইয়াৰ দ্বাৰা কোম্পানীসমূহে গৱেষণা আৰু উৎপাদন ক্ষমতা সম্প্ৰসাৰণত সহায় কৰিব। ভাৰতে কেৱল ঘৰুৱা চাহিদা পূৰণ কৰাই নহয় ব্ৰিটেইন, আমেৰিকা, ইউ এ ইৰ দৰে ডাঙৰ দেশৰ সৈতে বাণিজ্যিক চুক্তিৰ জৰিয়তেও বিশ্বব্যাপী উপস্থিতি লাভ কৰিছে।
