এই ঘটনা সংঘটিত হয় কৰ্ণাটকৰ ৰাজধানী বেংগালুৰুত। এজন অটো চালকে বুকিং বাতিল কৰাৰ বাবে এগৰাকী মহিলাক শাৰিৰীক তথা মানসিকভাৱে অপদস্থ কৰে।
বুকিং বাতিল কৰাৰ বাবে, অটো চালকজন ইমানেই অগ্নিশৰ্মা উঠে যে, তেওঁ মহিলাগৰাকীৰ সৈতে তৰ্ক কৰিবলৈ আৰম্ভ কৰে। আনকি তেওঁক মহিলাগৰাকীক শাৰীৰিকভাৱে প্ৰহাৰো কৰে। অটো চালকজনৰ এই আচৰণৰ দ্বাৰা ভুক্তভোগী মহিলাগৰাকী হতবাক হৈ পৰে।
ভুক্তভোগী মহিলাগৰাকীয়ে এই সমগ্ৰ ঘটনা নিজৰ মোবাইল ফোনত ৰেকৰ্ড কৰে। লগতে তেওঁ এই ভিডিঅ’ সামাজিক মাধ্যমত শ্বেয়াৰ কৰে আৰু নিজকে চহৰখনত অসুৰক্ষিত বুলি দাবী কৰে।
অটো চালকজনৰ এই ভিডিঅ’ সামাজিক মাধ্যমত ভাইৰেল হৈ পৰে। এই ভিডিঅ’ত, দেখিবলৈ পোৱা মতে, অটো চালকজনে মহিলাগৰাকীৰ সৈতে আক্ৰমণাত্মকভাৱে তৰ্ক-বিতৰ্কত লিপ্ত হয়। আনকি তেওঁ মহিলাগৰাকীক শাৰিৰীকভাৱে অপদস্থ কৰাৰ লগতে তেওঁৰ মোবাইল ফোনো কাঢ়ি নিবলৈ চেষ্টা কৰে।
তৰ্কৰ সময়ত, যেতিয়া যুৱতীগৰাকীয়ে অটো চালকজনক সোধে যে, তেওঁ কিয় চিঞৰি আছে, তেতিয়া তেওঁ অটোখন নিজৰ দেউতাকৰ নেকি বুলি ওলোটাই প্ৰশ্ন কৰে।
ইতিমধ্যে আৰক্ষীয়ে অভিযুক্ত অটো চালকজনক গ্ৰেপ্তাৰ কৰে। পশ্চিম বেংগালুৰুৰ ডিচিপিৰ মতে, অভিযুক্ত অটোচালকজনক মুথুৰাজক মাগাদি ৰোড আৰক্ষীয়ে গ্ৰেপ্তাৰ কৰে। লগতে তেওঁৰ ওপৰত উচিত আইনী ব্যৱস্থা লোৱা হ’ব বুলি জানিবলৈ দিয়ে।
উল্লেখ্য যে, এই ঘটনাটোৰ ভিডিঅ’ ছচিয়েল মিডিয়া প্লেটফৰ্ম ‘এক্স’ত পোষ্ট কৰি ভুক্তভোগীয়ে লিখে যে, বেংগালুৰুত তেওঁ অটো বুকিং বাতিল কৰাৰ বাবে এজন অটো চালকৰ দ্বাৰা শাৰীৰিক আৰু মানসিকভাৱে তীব্ৰ নিৰ্যাতনৰ সন্মুখীন হ’ব লগা হয়। মহিলাগৰাকীয়ে অটো চালকজনৰ বিৰুদ্ধে অ’লা কোম্পানীতো অভিযোগ দাখিল কৰে।
