আজি ভাৰত আৰু ফ্ৰান্সৰ মাজত ২৬খন ৰাফেল-এম যুঁজাৰু বিমানৰ ৬৩ হাজাৰ কোটি টকাৰ চুক্তি ছীল কৰা হ’ব। পেহেলগাম সন্ত্ৰাসবাদী আক্ৰমণৰ পিছতেই ভাৰতৰ সামৰিক প্ৰস্তুতিৰ বাবে চিন্তিত পাকিস্তানৰ বাবে এয়া হ’ব এক নতুন উত্তেজনা।
এই ৰাফেলে ভাৰত মহাসাগৰত ভাৰতীয় নৌসেনাৰ শক্তি বৃদ্ধি কৰিব। একে সময়তে আৰব সাগৰত পাকিস্তানৰ নৌসেনাৰ বাবে নতুন সমস্যাৰ সৃষ্টি হ’ব৷
ভাৰত আৰু ফ্ৰান্সৰ এই চুক্তিৰ অধীনত ২২খন একক আসনৰ জেট বিমান ক্ৰয় কৰা হ’ব। ইয়াৰ উপৰিও ৪খন দুজনীয়া ট্ৰেইনাৰ জেট বিমানো ক্ৰয় কৰা হ’ব। এই ৰাফেল-এম যুদ্ধ বিমানে বিমানবাহী জাহাজৰ পৰা উৰণ আৰু অৱতৰণ কৰিব পাৰিব। ইয়াৰ ফলত ভাৰতীয় নৌসেনাৰ শক্তি আৰু অধিক বৃদ্ধি পাব। ইতিমধ্যে ভাৰতীয় বায়ুসেনাই ৬০ হাজাৰ কোটি টকাত ফ্ৰান্সৰ পৰা ৩৬খন ৰাফেল যুদ্ধ বিমান ক্ৰয় কৰিছে।
এই চুক্তিৰ অধীনত ফ্ৰান্সে অস্ত্ৰ-শস্ত্ৰ, চিমুলেটৰ, পাইলট আৰু কৰ্মচাৰীৰ প্ৰশিক্ষণ আৰু মেৰামতিৰ বাবেও ৫ বছৰৰ সেৱা আগবঢ়াব। এই চুক্তিৰ অধীনত বায়ুসেনাৰ ৩৬খন ৰাফেলৰ স্পেয়াৰ পাৰ্টছ আৰু মেৰামতিৰ দায়িত্বও ল’ব ডাছ’ল্টে। প্ৰধানমন্ত্ৰী নৰেন্দ্ৰ মোদীৰ নেতৃত্বত ৯ এপ্ৰিলত নিৰাপত্তা বিষয়ক কেবিনেট বৈঠকত এই চুক্তিত অনুমোদন জনোৱা হয়। বায়ুসেনাৰ ৰাফেলৰ দুটা স্ক্ৱাড্ৰন বৰ্তমান আম্বালা আৰু হাছিমাৰা বিমানঘাটিত নিয়োজিত হৈ আছে। নতুন যুঁজাৰু বিমানৰ চুক্তিৰ লগে লগে ভাৰতত ৰাফেলৰ শক্তি ৬২ হ’ব৷
