ভাৰতৰ হাতত পৰাস্ত হোৱাৰ পিছত পাকিস্তানৰ অৱস্থা অতি শোচনীয় হৈ পৰিছে। ভাৰতে ১৩টা সামৰিক ঘাটি ধ্বংস কৰাৰ পিছতো প্ৰথমে অসীম মুনীৰক ফিল্ড মাৰ্শ্বাল পদবী দিয়া হৈছিল। লগতে ভাৰতৰ ওপৰত ভুৱা আক্ৰমণৰ কাহিনী ৰচনা কৰিবলৈ গৈ চীনৰ ৰকেট বাহিনীৰ পৰাক্ৰমৰ ছবি দাঙি ধৰিছে।
পাকিস্তানৰ প্ৰধানমন্ত্ৰী শ্বাহবাজ শ্বৰীফে অসীম মুনিৰক ফিল্ড মাৰ্শ্বাল পদবী প্ৰদানৰ উপলক্ষে আয়োজন কৰা ৰাতিৰ আহাৰ গ্ৰহণৰ সময়ত এখন ফটো উপহাৰ দিয়ে। এই ফটোখনত অপাৰেচন সেন্দুৰৰ সময়ত পাকিস্তান সেনাৰ আৰ্টিলাৰীয়ে ভাৰতক কেনেকৈ আক্ৰমণ কৰিছিল তাক চিত্ৰিত কৰা হৈছে বুলি কোৱা হৈছিল। ছবিখনত একেলগে কেইবাটাও একাধিক ৰকেট লঞ্চাৰ ব্যৱস্থাই গুলী চলোৱাও দেখা গৈছে।
পিছে এই ফটোখন যেতিয়া তথ্য পৰীক্ষা কৰা হয়, তেতিয়া দেখা যায় যে ফটোখন পাকিস্তানী সেনাৰ নহয়, চীনৰ পিএলএ সেনাৰ ৰকেট ফ’ৰ্চৰ। এই ছবিখন ২০১৯ চনৰ, যিখন চীন সেনাই সামৰিক অনুশীলনৰ সময়ত তুলিছিল। এই ছবিখন চীনৰ পিএলএ-সেনাৰ ৱেবছাইটতো দেখিবলৈ পোৱা গৈছে। শ্বাহবাজ শ্বৰীফে ২০১৯ বৰ্ষৰ চীনা সেনাৰ ছবি এখন উপহাৰ দিয়াৰ কথা জানিব পৰাৰ লগে লগে পাকিস্তানত মানুহে তেওঁক ঠাট্টা কৰিবলৈ আৰম্ভ কৰে।
এইয়া কোনো নতুন কথা নহয়। পাকিস্তানে পূৰ্বেও নিজৰ জয় হোৱা বুলি ভুৱা বাতৰি প্ৰচাৰ কৰি আহিছে। অপাৰেচন সেন্দুৰৰ সময়ত পাকিস্তানৰ বৈদেশিক মন্ত্ৰী ইছহাক দাৰে নিজ দেশৰ সংসদত লণ্ডনৰ ডেইলী টেলিগ্ৰাফৰ এটা ক্লিপিং দেখুৱাই ভাৰতীয় বায়ুসেনাক উপহাস কৰিবলৈ চেষ্টা কৰিছিল যদিও পাকিস্তানৰ এখন বাতৰি কাকতে নিজেই নিজৰ বৈদেশিক মন্ত্ৰী (আৰু উপ-প্ৰধানমন্ত্ৰী)ৰ মিছা কথা উদঙাই দিয়ে।
একেদৰে সাংবাদিকৰ সৈতে হোৱা এক সাক্ষাৎকাৰত পাকিস্তানৰ প্ৰতিৰক্ষা মন্ত্ৰী খোৱাজা আছিফে ভাৰতৰ যুদ্ধ বিমান সন্দৰ্ভত কৰা দাবীৰ সমৰ্থনত ছ’চিয়েল মিডিয়াৰ উদ্ধৃতি দিয়ে। অৰ্থাৎ ভাৰতৰ হাতত পৰাস্ত হোৱাৰ পিছত নিজৰ ক্ষোভ প্ৰকাশ কৰিবলৈ পাকিস্তানী শাসকসকলে যিকোনো পৰিসৰলৈকে ভুৱা আৰু ভিত্তিহীন বাতৰি প্ৰচাৰ কৰাত ব্যস্ত হৈ পৰিছে।
