পেৰিছ অলিম্পিকৰ পৰা ভাৰতলৈ আহিল এটি সুখবৰ। শুকুৰবাৰে দেশলৈ ব্ৰঞ্জৰ পদক কঢ়িয়াই আনিলে মল্লযুঁজাৰু অমন শ্বেহৰাৱাটে। ৫৭কেজি শাখাত অংশগ্ৰহণ কৰি সফলতা অৰ্জন কৰিবলৈ সক্ষম হয় ভাৰতীয় মল্লযুজাঁৰুগৰাকীয়ে। উল্লেখ্য যে, বৰ্তমানলৈকে পেৰিছ অলিম্পিকত ভাৰতে এটা ৰূপ আৰু ৫টা ব্ৰঞ্জৰ পদক লাভ কৰিছে।
প্ৰথমবাৰৰ বাবে অলিম্পিকত প্ৰৱেশ কৰিয়েই তেওঁ পদক অৰ্জন কৰা একমাত্ৰ ভাৰতীয় খেলুৱৈৰ খিতাপ দখল কৰে অমন শ্বেহৰাৱাটে। এই পদক অৰ্জন কৰি অমনে ৰচনা কৰে এক ইতিহাস।
উল্লেখ্য যে, ২০০৮ বেইজিং অলিম্পিকৰ পৰাই ধাৰাবাহিকভাৱে ভাৰতে মল্লযুঁজত পদক অৰ্জন কৰি আহিছে। ২০০৮ত সুশীল কুমাৰে ব্ৰঞ্জৰ পদক, ২০১২চনত সুশীল কুমাৰে ৰূপৰ পদক আৰু যোগেশ্বৰ দত্তই ব্ৰঞ্জৰ পদক অৰ্জন কৰিছিল।
আকৌ ২০১৬চনৰ ৰিঅ’ অলিম্পিকত সাক্ষী মালিকে ব্ৰঞ্জৰ পদক, ২০২০চনত ৰবি দহিয়া ৰূপৰ আৰু বজৰং পুণিয়াই ব্ৰঞ্জৰ পদক অৰ্জন কৰে। ইয়াৰ পাছতে এইবাৰ ২০২৪ৰ পেৰিছ অলিম্পিকত মল্লযুঁজত অমনে ব্ৰঞ্জৰ পদক অৰ্জন কৰিবলৈ সক্ষম হয়।
