পুনৰ এবাৰ বিদেশ ভ্ৰমণলৈ যাবলৈ সাজু হৈছে প্ৰধানমন্ত্ৰী নৰেন্দ্ৰ মোদী। ৫ দিনীয়া যাত্ৰাত তেওঁ তিনিখন দেশ ভ্ৰমণ কৰিব। এই যাত্ৰাত তেওঁ প্ৰথমখন দেশ ভ্ৰমণ কৰিব চাইপ্ৰাছ। ১৫-১৬ জুন অৰ্থাত দুদিনীয়া ভ্ৰমণসূচীৰে বিভিন্ন কাৰ্যসূচীত অংশ ল’ব মোদীয়ে।
ইয়াৰ পিছত তেওঁ কানাডা আৰু ১৮ জুনত ক্ৰোৱেচিয়া ভ্ৰমণ কৰিব। এই ভ্ৰমণসূচী সামৰি তেওঁ ১৯ জুনত ভাৰতলৈ উভতিব।
প্ৰধানমন্ত্ৰী মোদীয়ে চাইপ্ৰাছ ৰিপাব্লিকৰ ৰাষ্ট্ৰপতি নিকোছ ক্রিষ্টোডুলাইডছৰ আমন্ত্ৰণত ২ দিনৰ বাবে (১৫-১৬ জুন ২০২৫) যাব। উল্লেখ্য যে যোৱা ২ দশকৰ পিছত এইটোৱে প্ৰথম ভাৰতীয় প্ৰধানমন্ত্ৰীৰ চাইপ্ৰাছ ভ্ৰমণ। এই সময়ছোৱাত প্ৰধানমন্ত্ৰী মোদীয়ে নিকোছিয়াত চাইপ্ৰাছৰ ৰাষ্ট্ৰপতি ক্রিষ্টোডুলাইডছৰ সৈতে দ্বিপাক্ষিক আলোচনাত মিলিত হ’ব আৰু লিমাছোলত ব্যৱসায়িক নেতাসকলকো সম্বোধন কৰিব৷ প্ৰধানমন্ত্ৰীৰ এই ভ্ৰমণে দুয়োখন দেশৰ মাজত শক্তিশালী দ্বিপাক্ষিক সম্পৰ্কৰ বাৰ্তা প্ৰদান কৰিব।
প্ৰধানমন্ত্ৰী মোদীয়ে দ্বিতীয় কাৰ্যসূচী লৈ উপস্থিত হ’ব কানাডাত। ১৬-১৭ জুনত কানানাস্কিছত অনুষ্ঠিত হ’বলগীয়া জি-৭ শীৰ্ষ সন্মিলনৰ অংশ হিচাপে তেওঁ কানাডাৰ প্ৰধানমন্ত্ৰী মাৰ্ক কাৰ্নীৰ আমন্ত্ৰণত অংশগ্ৰহণ কৰিব।
উল্লেখ্য যে, প্ৰধানমন্ত্ৰী মোদীয়ে একেৰাহে ৬ বাৰ জি-৭ সন্মিলনৰ অংশ হ’ব। প্ৰধানমন্ত্ৰী মোদীয়ে এই সন্মিলনত জি-৭ দেশৰ আমন্ত্ৰিত দেশ আৰু আন্তঃৰাষ্ট্ৰীয় সংস্থাসমূহৰ মুৰব্বীসকলৰ সৈতে প্ৰযুক্তি, উদ্ভাৱন, শক্তি আৰু এআইৰ সৈতে জড়িত বিষয়সমূহৰ ওপৰত আলোচনাত মিলিত হ’ব। এই সময়ত তেওঁ দ্বিপাক্ষিক বৈঠকতো অংশ ল’ব।
ইয়াৰ পিছত তেওঁ ১৮ জুনত ক্ৰ’ৱেচিয়া ভ্ৰমণ কৰিব। ক্ৰ’ৱেচিয়াৰ প্ৰধানমন্ত্ৰী অপ্লেনকোভিচৰ আমন্ত্ৰণত তেওঁ যাব। ভাৰতৰ যিকোনো প্ৰধানমন্ত্ৰীৰ এইটোৱে হ’ব প্ৰথম ক্ৰ’ৱেচিয়া ভ্ৰমণ। দুয়োখন দেশৰ দ্বিপাক্ষিক সম্পৰ্কৰ এয়া এক গুৰুত্বপূৰ্ণ সাফল্য। এই ভ্ৰমণৰ সময়ত প্ৰধানমন্ত্ৰী মোদীয়ে ক্ৰ’ৱেচিয়াৰ ৰাষ্ট্ৰপতিকো জোৰাণ মিলানোভিচকো সাক্ষাৎ কৰিব।
