টাটা ষ্টীল মাষ্টাৰ্ছৰ খিতাপ দখল কৰিছে গ্ৰেণ্ডমাষ্টাৰ আৰ প্ৰজ্ঞানন্দই। টাইব্ৰেকাৰত প্ৰজ্ঞানন্দই বিশ্ব চেম্পিয়ন ডি গুকেশক ২-১ ব্যৱধানত পৰাস্ত কৰি খিতাপ দখল কৰে।
উল্লেখ্য যে, ইয়াৰ পূৰ্বে দুয়োগৰাকী ভাৰতীয় খেলুৱৈয়ে শেষ দিনটোত নিজৰ মেচত পৰাস্ত হৈছিল আৰু পিছত দুয়োৰে মাজত খিতাপৰ বাবে টাইব্ৰেকাৰ মেচ অনুষ্ঠিত হৈছিল। য’ত প্ৰজ্ঞানন্দই জয়লাভ কৰে।
প্ৰজ্ঞানন্দ আৰু গুকেশ দুয়োজনেই অন্তিম ৰাউণ্ডৰ মেচত পৰাস্ত হৈছিল। অৰ্জুন এৰিগাইছিৰ হাতত গুকেশ পৰাস্ত হোৱাৰ বিপৰীতে প্ৰজ্ঞানন্দই জাৰ্মানীৰ ভিনচেণ্ট কীমাৰৰ হাতত পৰাস্ত হয়। এই অসফলতাৰ মাজতো তেওঁলোক লিডাৰব’ৰ্ডৰ শীৰ্ষত থকা বাবে প্ৰতিযোগিতাখন টাইব্ৰেকাৰলৈ যায়।
প্ৰজ্ঞানন্দই সম্পূৰ্ণ পইণ্ট লাভ কৰি মাষ্টাৰ্ছত প্ৰথমটো জয় নিশ্চিত কৰাৰ বাবে নিখুঁত কৌশল প্ৰদৰ্শন কৰাৰ বিপৰীতে গুকেশে একেৰাহে দ্বিতীয়বাৰৰ বাবে শীৰ্ষস্থানত থাকিও টাইব্ৰেকাৰত পৰাস্ত হয়। যোৱা বছৰ অৰ্থাত পূৰ্বৰ সংস্কৰণতো চীনা প্ৰতিদ্বন্দ্বী ৱেই য়িৰ হাতত পৰাস্ত হৈছিল গুকেশ।
