চৰকাৰী ধন পাবলৈ প্ৰতিজন ব্যক্তিৰ হেঁপাহ থাকে। যাৰবাবে চৰকাৰে প্ৰণয়ন কৰা বিভিন্ন আঁচনিৰ লাভালাভ উঠাবলৈ সাধাৰণ জনতাই চেষ্টা কৰে।
চৰকাৰে আঁচনিসমূহৰ জৰিয়তে যোগ্য ব্যক্তিসকলক পেঞ্চন বা অন্য সুবিধাসমূহ দিবলৈ চেষ্টা কৰে। অৱশ্যে, পঞ্জাৱত এক জৰীপৰ জৰিয়তে কেইবালাভ লোকে ভুৱাকৈ পেঞ্চন লাভ কৰি আছে বুলি এক তথ্যত প্ৰকাশ পাইছে।
পঞ্জাৱ চৰকাৰে ২.৪৪ লাখ হিতাধিকাৰীৰ পৰা পেঞ্চন আঁচনিৰ অধীনত ১৪৫.৭৩ কোটি টকা উদ্ধাৰ কৰিছে। যিসকলে লোকে পেঞ্চন লাভ কৰি আছিল তেওঁলোকৰ সৰহভাগ লোক অযোগ্য বা তেওঁলোকৰ বহু ব্যক্তি বৰ্তমান জীৱিত নহয় বুলি তথ্যত প্ৰকাশ পাইছে।
পঞ্জাৱৰ সামাজিক সুৰক্ষা, মহিলা আৰু শিশু বিকাশ মন্ত্ৰী ড০ বলজিৎ কৌৰে চৰকাৰৰ এই পদক্ষেপক যুগান্তৰকাৰী পদক্ষেপ আখ্যা দিছে।
পঞ্জাৱ চৰকাৰে এই বিত্তীয় বৰ্ষত (২০২৪-২৫) পেঞ্চন আঁচনিৰ অধীনত মুঠ ২,৫০৫.৫২ কোটি টকা ৩৩.৫৮ লাখ হিতাধিকাৰীক বিতৰণ কৰিছে। এই আঁচনিৰ অধীনত বৃদ্ধ, বিধৱা, নিৰ্ভৰশীল শিশু আৰু বিশেষভাৱে সক্ষম লোকক প্ৰতি মাহে ১,৫০০ টকাৰ পেঞ্চন দিয়া হয়।
প্ৰতিবেদনত প্ৰকাশ পাইছে যে, ২০২২-২৩ বিত্তীয় বৰ্ষত প্ৰায় ১.২৩ লাখ হিতাধিকাৰীৰ নামত পেঞ্চন জাৰী কৰা হৈছিল। একেদৰে ২০২৩-২৪ বিত্তীয় বৰ্ষত, ১.০৭ লাখ হিতাধিকাৰী মৃত অৱস্থাত পোৱা গৈছিল।
২০২৪-২৫ বৰ্ষত (২০২৪ চনৰ জুলাই লৈকে) ১৪,১৬০ জন হিতাধিকাৰীৰ পৰা ২৬.৫৯ কোটি টকা উদ্ধাৰ কৰা হৈছে।
চৰকাৰৰ কঠোৰ স্থিতি
চৰকাৰে এই ক্ষেত্ৰত কঠোৰ স্থিতি গ্ৰহণ কৰিছে। পেঞ্চন আঁচনিয়ে বৃদ্ধ, বিধৱা, নিৰ্ভৰশীল শিশু আৰু বিশেষভাৱে সক্ষমলোকৰ জীৱনত এক গুৰুত্বপূৰ্ণ ভূমিকা পালন কৰে। সেয়েহে যোগ্য হিতাধিকাৰীয়ে পেঞ্চনৰ লাভালাভ পোৱাটো জুৰুৰী।
