২৫ জুলাইৰ পুৱা ৰাজস্থানৰ ঝলাৱাৰ জিলাত এক ভয়ংকৰ দুৰ্ঘটনা সংঘটিত হয়। য’ত মনোহৰ্থনা ব্লকৰ পিপলোডী গাঁৱত অৱস্থিত চৰকাৰী উচ্চ প্ৰাথমিক বিদ্যালয়ৰ চাল ভাঙি যায়, তাৰ পিছত বিদ্যালয়খনৰ দেৱালো ভাঙি পৰে।
এই মৰ্মান্তিক দুৰ্ঘটনাত ৪টা শিশুৰ মৃত্যু হোৱাৰ লগতে আন বহু শিশু ধ্বংসাৱশেষৰ তলত আৱদ্ধ হৈ পৰাৰ আশংকা কৰা হৈছে।
এই সমগ্ৰ ঘটনাৰ পিছতে অঞ্চলটোত বিশৃংখলতাৰ সৃষ্টি হোৱাৰ লগতে উদ্ধাৰৰ বৰ্তমানেও কাম চলি আছে। শিক্ষামন্ত্ৰী মদন দিলাৱাৰে এই দুৰ্ঘটনাত ৩টা শিশুৰ মৃত্যু হোৱা বুলি নিশ্চিত কৰিছে। তেওঁ ফোনযোগে উদ্ধাৰকাৰীৰ সৈতে কথা পাতি সাহায্য আৰু উদ্ধাৰৰ কাম ক্ষিপ্ৰতাৰে কৰাৰ লগতে আহত শিশুসকলৰ চিকিৎসাৰ উপযুক্ত ব্যৱস্থা কৰিবলৈ নিৰ্দেশ দিয়ে।
বৰ্তমান জেচিবি মেচিনৰ সহায়ত এই ধ্বংসাৱশেষ আঁতৰোৱা হৈছে। লগতে আহত শিশুকেইটাক মনোহৰ্থনাৰ কমিউনিটি হেল্থ চেণ্টাৰলৈ প্ৰেৰণ কৰা হৈছে। তাত উপস্থিত স্থানীয় গাঁওবাসীয়েও উদ্ধাৰ কামত প্ৰশাসনক সহায় কৰিছে।
দুৰ্ঘটনা সংঘটিত হোৱাৰ সময়ত বিদ্যালয়খনত কেইবাজনো ছাত্ৰ-ছাত্ৰী উপস্থিত আছিল। স্থানীয় ৰাইজে জনোৱা মতে, হঠাতে চালখন ভাঙি পৰাত ৬০ৰো অধিক শিশু ভিতৰত আৱদ্ধ হৈ পৰাৰ আশংকা কৰা হৈছে। দুৰ্ঘটনাৰ পৰিসৰৰ প্ৰতি লক্ষ্য ৰাখি মৃত্যুৰ সংখ্যা বৃদ্ধি পোৱাৰ সম্ভাৱনা আছে।
আচলতে প্ৰাথমিক তথ্য অনুসৰি, বিদ্যালয় ভৱনৰ চালখন জৰাজীৰ্ণ অৱস্থাত আছিল, যাৰ বাবেই এই দুৰ্ঘটনা সংঘটিত হয়। একে সময়তে ধাৰাসাৰ বৰষুণৰ ফলত দেৱালত আৰ্দ্ৰতাৰ বাবে দুৰ্বলতাও ইয়াৰ অন্যতম কাৰণ বুলি উল্লেখ কৰে স্থানীয় ৰাইজে।
