কলিকতা আৰজি কৰ হাস্পতালত সংঘটিত ভয়ংকৰ ধৰ্ষণ কাণ্ডৰ কথা নিশ্চয়কৈ মনত আছে সকলোৰে। দেশ জোঁকাৰি যোৱা এই ঘটনাত নাম সাঙোৰ খোৱা হাস্পতালখনৰ প্ৰাক্তন অধ্যক্ষ সন্দীপ ঘোষ আৰু তালা আৰক্ষী থানাৰ প্ৰভাৰী অভিজিত মণ্ডলে শুকুৰবাৰে জামিন লাভ কৰিছে।
শিয়ালদহৰ বিশেষ আদালতে এই দুয়োজন অভিযুক্তক জামিন প্ৰদান কৰে। এই ঘটনাৰ তদন্ত কৰি থকা চি বি আইয়ে ৯০ দিনৰ ভিতৰত চাৰ্জশ্বিট দাখিল কৰিব নোৱাৰা বাবেই দুয়োজনে জামিন লাভ কৰে।
উল্লেখ্য যে, চলিত বছৰৰ ৯ আগষ্টত কলিকতাৰ আৰজি কৰ হাস্পতালৰ এগৰাকী প্ৰশিক্ষণৰত মহিলা চিকিসকক ধৰ্ষণ কৰি নৃশংসভাৱে হত্যা কৰাৰ ঘটনা সংঘটিত হৈছিল।
দেশ জোঁকাৰি যোৱা এই ঘটনাৰ পিছতে চিবিআইয়ে ১৪ ছেপ্তেম্বৰত ঘোষ আৰু মণ্ডলক গ্ৰেপ্তাৰ কৰিছিল। এই নৃশংস ঘটনাৰ প্ৰমাণ নষ্ট কৰাৰ অভিযোগত দুয়োজনকে গ্ৰেপ্তাৰ কৰিছিল।
শুকুৰবাৰে যেতিয়া এই গোচৰটো অতিৰিক্ত মুখ্য ন্যায়িক দণ্ডাধীশৰ আদালতত উত্থাপন হয়, তেতিয়া চিবিআইৰ অধিবক্তাগৰাকীয়ে কয় যে এই গোচৰৰ অভিযোগনামা প্ৰস্তুত কৰিবলৈ চিবিআইক আৰু অধিক সময়ৰ প্ৰয়োজন হ’ব। ইয়াৰ পিছতে ন্যায়াধীশে দুয়োজন অভিযুক্তক জামিন মঞ্জুৰ কৰে।
উল্লেখ্য যে এই ঘটনাত জামিন লাভ কৰিলেও আন এটা গোচৰৰ বাবে জেইলতে থাকিব সন্দীপ ঘোষ। তেওঁৰ কাৰ্যকালৰ সময়ত বিত্তীয় অনিয়ম সংঘটিত কৰাৰ অভিযোগত তেওঁৰ বিৰুদ্ধে আন গোচৰো ৰুজু হৈছিল।
