মানচেষ্টাৰত ইংলেণ্ডৰ বিৰুদ্ধে চলি থকা চতুৰ্থখন টেষ্ট মেচত ভাৰতীয় উইকেটকীপাৰ ঋষভ পন্তে এক বিশেষ অভিলেখ গঢ়িবলৈ সক্ষম হয়। চতুৰ্থখন টেষ্টৰ প্ৰথম দিনা সোঁ-ভৰিৰ আঙুলিত আঘাত পোৱাৰ বাবে ৰিটায়াৰ্ড হাৰ্ট হৈ খেলপথাৰ ত্যাগ কৰিছিল।
আঘাত গুৰুতৰ হোৱাৰ প্ৰতি লক্ষ্য ৰাখি ক্ৰিকেট অনুৰাগীসকলে মানি ল’বলৈ বাধ্য হৈছিল তেওঁ আৰু বেটিং কৰিবলৈ খেলপথাৰত নামিব নোৱাৰিব। মেচৰ দ্বিতীয় দিনা চাৰ্দুল ঠাকুৰ আউট হোৱাৰ পিছতেই হাতত বেট লৈ পুনৰ খেলপথাৰত প্ৰৱেশ কৰে ঋষভ পন্তে।
এই সময়তে তেওঁ ভংগ কৰে ভাৰতীয় ক্ৰিকেট দলৰ প্ৰাক্তন অধিনায়ক মহেন্দ্ৰ সিং ধোনীৰ নামত থকা এক বিশেষ অভিলেখ। এটা শৃংখলাত সৰ্বাধিক অৰ্ধশতক অৰ্জন কৰা ভাৰতীয় উইকেটকীপাৰ বেটাৰত পৰিণত হয় পন্ত।
আঘাতৰ সৈতেই বেট ধৰিবলৈ অহা মানচেষ্টাৰ টেষ্টৰ প্রথম ইনিংছত ঋষভ পন্তে ৭৫ বলত ৫৪ ৰানৰ অৰ্ধশতকীয় ইনিংছ খেলে। ইংলেণ্ডৰ বিৰুদ্ধে এই শৃংখলাটোত পন্তৰ আছিল পঞ্চমটো অৰ্ধশতকীয় ইনিংছ। ইয়াৰ লগে লগে পন্তে এটা শৃংখলাত সৰ্বাধিক অৰ্ধশতক অৰ্জন কৰা উইকেটকীপাৰ বেটছমেন হিচাপে পৰিগণিত হয়। ইয়াৰ পূৰ্বে এই অভিলেখ ভাৰতৰ কিংবদন্তি খেলুৱৈ ফাৰুক ইঞ্জিনিয়াৰ আৰু প্ৰাক্তন অধিনায়ক মহেন্দ্ৰ সিং ধোনীৰ নামত আছিল।
ভাৰতৰ প্ৰাক্তন কিংবদন্তি খেলুৱৈ ফাৰুক ইঞ্জিনিয়াৰে ১৯৭২-৭৩ চনত ইংলেণ্ডৰ বিৰুদ্ধে টেষ্ট শৃংখলাত চাৰিটা অৰ্ধশতকীয় ইনিংছ খেলিছিল।
ভাৰতীয় দলৰ প্ৰাক্তন অধিনায়ক তথা ক্ৰিকেটাৰ এম এছ ধোনীয়ে দুবাৰকৈ এই কৃতিত্ব অৰ্জন কৰিছে। ২০০৮-০৯ চনত অষ্ট্ৰেলিয়াৰ বিৰুদ্ধে প্ৰথমে চাৰিটা অৰ্ধশতক অৰ্জন কৰিছিল ধোনীয়ে। আনহাতে ২০১৪ চনত ইংলেণ্ডৰ বিৰুদ্ধে খেলা শৃংখলাত দ্বিতীয়বাৰৰ বাবে চাৰিটা অৰ্ধশতক সংগ্ৰহ কৰিছিল।
এতিয়া ভাৰতীয় টেষ্ট দলৰ উপ-অধিনায়ক ঋষভ পন্তে চতুর্থ টেষ্টৰ প্রথম ইনিংছলৈকে এই শৃংখলাত পাঁচটা অৰ্ধশতক অর্জন কৰিছে৷
