ছ’চিয়েল মিডিয়াত নিজকে ভাইৰেল কৰিবলৈ বৰ্তমান সময়ত বহুতে কৰে বিভিন্ন ধৰণৰ নীতি বৰ্হিভূত কাম। একাংশই ৰিলছ বনালে নামানে গুৰু গোঁসাই, নামানে আৰক্ষী কিম্বা প্ৰসাশনৰ কোনো নিয়ম। লাগে সস্তীয়া জনপ্ৰিয়তা, লাগে কেইটামান লাইক আৰু চাবছক্ৰাইবাৰ।
কেইটামান লাইকৰ বাবে ভৰিৰে মোহাৰি পেলাব পাৰে সকলো আৰক্ষী তথা প্ৰশাসনৰ নিয়ম। এনে এক ঘটনাই সংঘটিত হৈছে পঞ্জাৱৰ লুধিয়ানাত।
অৰ্ধনগ্ন যুৱকে নিজৰ শৰীৰ উলিয়াই ৰাজপথত দেখালে বাইক ষ্টান্ত আৰু কিছু মুহুৰ্তৰ পাছতেই ভাইৰেল হৈ পৰিল ভিডিঅ’।
পঞ্জাৱৰ লুধিয়ানা জিলাৰ ছ’চিয়েল মিডিয়া ইনফ্লুয়েনচাৰ বিশাল ৰাজপুটে কেইটামান লাইক আৰু চাবছক্ৰাইবৰ বাবে ৰাজপথতেই গৈ থকা বাইকৰ ওপৰত বনালে ভিডিঅ’। ভিডিঅ’ত স্পষ্টৰূপে দেখা গৈছে বিশালে নিজৰ চোলা খুলি দেখাই আছে বিভিন্ন দুঃসাহকিক ষ্টান্ত।
অৱশ্যে ভিডিঅ’টো বিশালে নিজৰ ছ’চিয়েল মিডিয়া একাউন্টত শ্বেয়াৰ কৰাৰ কিছু সময় পিছতে ভাইৰেল হৈ পৰিল আৰু তেতিয়াই চকু পৰিল লুধিয়ানা আৰক্ষীৰ। আৰক্ষীয়ে বিচাৰি উলিয়াই কেইবা হাজাৰ টকাৰ জৰিমনা বিহিলে বিশালক।
উল্লেখ্য যে, এনে উদণ্ড বাইকাৰ্চৰ বাবেই বহু সময়ত সংঘটিত হৈ আহিছে বহু অপ্ৰীতিকৰ ঘটনা। যাৰ বাবে অকালতেই প্ৰাণ গৈছে বহুতো নিৰিহ লোকৰ আৰু পংগুত্ব জীৱন কটাইছে অসংখ্য লোকে।
