ৰাছিয়াৰ ব্ৰায়ানস্ক অঞ্চলত দেওবাৰে সংঘটিত হয় এক ভয়ংকৰ ৰে’ল দুৰ্ঘটনা। ইউক্ৰেইন সীমান্তৰ পৰা কিছু নিলগত হঠাতে এখন দলং ভাঙি যোৱাৰ বাবে ৰে’ল দুৰ্ঘটনাটো সংঘটিত হয়। এই দুৰ্ঘটনাটোত কমেও সাতগৰাকী লোকৰ মৃত্যু হোৱাৰ লগতে ৩০ গৰাকীৰো অধিক লোক আহত হয়।
ৰাছিয়াৰ ৰে’ল বিভাগে এই দুৰ্ঘটনাটোক ষড়যন্ত্ৰ আখ্যা দিয়ে। মৃত লোকলৰ ভিতৰত আছে লোকোমটিভ ড্ৰাইভাৰ। ইফালে আঘাতপ্ৰাপ্ত লোকসকলৰ ভিতৰৰ এজনৰ অৱস্থা যথেষ্ট সংকটজনক বুলি জানিব পৰা গৈছে।
দুৰ্ঘটনাটোৰ পিছতেই ঘটনাস্থলত ১৮০ গৰাকীৰো অধিক লোকৰ এটা উদ্ধাৰকাৰী দল উপস্থিত হৈ উদ্ধাৰ অভিযান চলায়।
ৰাছিয়াৰ এটা টেলিগ্ৰাম চেনেল ‘বাজা’ই দাবী কৰা অনুসৰি এই দলংখন কোনো অজ্ঞাত দুষ্কৃতিকাৰীয়ে বোমাৰে উৰুৱাই দিছে। অৱশ্যে আন কোনো সংবাদ মাধ্যম বা ৰাছিয়া আৰু ইউক্ৰেইনৰ তৰফৰ পৰা কোনো আনুষ্ঠানিক বিবৃতি প্ৰকাশ পোৱা নাই।
উল্লেখ্য যে, ইউক্ৰেইনৰ সীমান্তৰ পৰা ১০০ কিলোমিটাৰ দূৰত্বত থকা ভাইগনিচস্কি জিলাত সংঘটিত হৈছে এই দুৰ্ঘটনা। ক্লিমোভ’ৰ পৰা মস্কো অভিমুখে গৈ আছিল ৰে’লখন। ইয়াৰ পূৰ্বে ব্ৰায়ানস্ক, কুৰ্স্ক আৰু বেলগ’ৰড আদি অঞ্চলত ইউক্ৰেইনে আক্ৰমণ সংঘটিত কৰি আহিছিল।
