আগন্তুক আই পি এলৰ পূৰ্বে সমীৰ ৰিজৱীয়ে নিজৰ বেটিং বিক্ৰমৰ বাবে বাতৰিৰ শিৰোণান দখল কৰিছে। আই পি এলৰ বিগত ছিজনত চেন্নাই ছুপাৰ কিংছৰ হৈ খেলা সমীৰ ৰিজৱীয়ে ২৩ বছৰ অনুৰ্ধ্ব ষ্টেট এ ট্ৰফীত ত্ৰিপুৰাৰ বিৰুদ্ধে খেলা মেচখনত দ্বিশতক অৰ্জন কৰি এই কৃতিত্ব প্ৰদৰ্শন কৰে।
প্ৰতিযোগিতাখনত উত্তৰ প্ৰদেশৰ অধিনায়কত্ব কৰি থকা সমীৰে ২০টা ছয় আৰু ১৩টা চাৰিৰ সহায়ত ৯৭টা বলত ২০১ ৰানৰ অপৰাজিত ইনিংছ খেলে। চাৰি নম্বৰত বেটিং কৰি তেওঁ এই কৃতিত্ব কৰিছিল।
সমীৰৰ এই প্ৰদৰ্শন দিল্লী কেপিটেলছৰ বাবে এক ডাঙৰ সকাহ। আই পি এল ২০২৫ৰ বাবে সমীৰক ৯৫ লাখ টকাত ক্ৰয় কৰিছিল দিল্লীয়ে। ইয়াৰ পূৰ্বে যোৱা ছিজনত অৰ্থাৎ ২০২৪ চনৰ আই পি এলত চেন্নাই ছুপাৰ কিংছে সমীৰক ৮.৪ কোটি টকাত ক্ৰয় কৰিছিল।
সৰ্বাধিক দ্ৰুততম দ্বিশতক অৰ্জনৰ অভিলেখ
সমীৰ ৰিজৱীৰ এই দ্বিশতক ২৩ বছৰ অনুৰ্ধ্ব ষ্টেট এ ট্ৰফীৰ আটাইতকৈ দ্ৰুততম দ্বিশতক হিচাপে পৰিগণিত হয়। সমীৰে ২০টা ছয় আৰু ১৩টা চাৰিৰ সহায়ত এই বিস্ফোৰক ইনিংছটো খেলে।
