দিল্লী বিধানসভা নিৰ্বাচনৰ এসপ্তাহ পূৰ্বে আন এক মোক্ষম আঘাতৰ সন্মুখীন হৈছে বিজেপি। ৰাজেন্দ্ৰ নগৰ বিধানসভাৰ বিজেপিৰ জ্যেষ্ঠ নেতা তথা দিল্লী প্ৰদেশৰ কাৰ্যবাহী সদস্য সঞ্জীৱ আৰোৰাই নিজৰ বৃহৎ সমৰ্থকসহ আম আদমী পাৰ্টি চমুকৈ আপত যোগদান কৰিছে।
আপৰ মুখ্য কাৰ্যালয়ত জ্যেষ্ঠ নেতা তথা সাংসদ সঞ্জয় সিঙে দলীয় পতাকা আৰু টুপি পিন্ধাই সকলোকে দললৈ স্বাগতম জনায়। এই যোগদান কাৰ্যসূচীত জ্যেষ্ঠ নেতা তথা ৰাজেন্দ্ৰ নগৰৰ প্ৰতিদ্বন্দ্বী দুৰ্গেশ পাঠকে সঞ্জীৱ আৰোৰাসহ প্ৰতিগৰাকী লোককৈ দললৈ আন্তৰিকতাৰে স্বাগতম জনায়।
যোগদান কাৰ্যসূচীৰ পিছতেই সংবাদ মাধ্যমক সম্বোধন কৰি সঞ্জয় সিঙে কয় যে বিজেপিৰ জ্যেষ্ঠ নেতা তথা ৰাজ্যিক কাৰ্যনিৰ্বাহক সদস্য সঞ্জীৱ আৰোৰাই সমগ্ৰ দলৰ সৈতে বিজেপি ত্যাগ কৰি আম আদমী পাৰ্টিত যোগদান কৰিছে। বিগত ২৫ বছৰ ধৰি বিজেপিৰ সৈতে জড়িত সঞ্জীৱ আৰোৰা আৰু এই সময়ছোৱাত তেওঁ দলৰ হৈ বিভিন্ন পদত কাম কৰি আহিছে।
ইফালে বিজেপিৰ বিৰুদ্ধে তীব্ৰ বিষোদগাৰ প্ৰকাশ কৰি এই সময়ত সঞ্জীৱ আৰোৰাই কয় যে বিগত ২৫ বছৰ ধৰি মই বিজেপিৰ সৈতে জড়িত হৈ আছো, কিন্তু দলত আজি ২৫ বছৰ পূৰ্বৰ মতাদৰ্শ নাই। ইমান বছৰে দলত সেৱা আগবঢ়োৱাৰ পিছত যি ভিত্তিত টিকট বিতৰণ কৰা হৈছিল, তাত কেৱল ময়েই নহয়, মোতকৈ বহু জ্যেষ্ঠ লোকক একাষৰীয়া কৰা হৈছে আৰু শেহতীয়াকৈ দলত যোগদান কৰা ব্যক্তিক টিকট প্ৰদান কৰিছে।
উল্লেখ্য যে, ৭০খন আসনযুক্ত দিল্লী বিধানসভাৰ নিৰ্বাচনৰ ভোটগ্ৰহণ অহা ৫ ফেব্ৰুৱাৰীত অনুষ্ঠিত হ’ব। এটা পৰ্যায়তে অনুষ্ঠিত হ’বলগীয়া নিৰ্বাচনৰ ভোটগণনা হ’ব ৮ ফেব্ৰুৱাৰীত।
