ভাৰতৰ প্ৰতিভাৱান বেটাৰ ছৰফৰাজ খানে সুন্দৰ বেটিঙৰ নিদৰ্শন দেখুৱাই আন্তঃৰাষ্ট্ৰীয় টেষ্ট কেৰিয়াৰৰ প্ৰথমটো শতক অৰ্জন কৰিবলৈ সক্ষম হয়। ২৬ বছৰীয়া ছৰফৰাজে নিউজিলেণ্ডৰ অনুভৱী বেগী বলাৰ টিম ছাউথিৰ এটা বাউণ্ডেৰীলৈ ঠেলি দি নিজৰ কেৰিয়াৰৰ প্ৰথমটো শতক অৰ্জন কৰে।
১৩টা চাৰি আৰু তিনিটা ছয়ৰ সহায়ত আন্তঃৰাষ্ট্ৰীয় কেৰিয়াৰৰ প্ৰথমটো শতক সম্পূৰ্ণ কৰে ছৰফৰাজে।
ভাৰতৰ হৈ ছৰফৰাজে এই পৰ্যন্ত চাৰিখন টেষ্ট মেচত অংশ লৈছে। চাৰিখন মেচৰ ৭ টা ইনিংছত এটা শতক আৰু চাৰিটা অৰ্ধশতকৰ সহায়ত ৩০০ৰো অধিক ৰান সংগ্ৰহ কৰিছে।
ছৰফৰাজে প্ৰথম শ্ৰেণী ক্ৰিকেট কেৰিয়াৰত ৫১ খন মেচৰ ৭৬টা ইনিংছত ৬৯.০৯ গড়ৰ সহায়ত ৪৪২২ ৰান সংগ্ৰহ কৰিছে। প্ৰথম শ্ৰেণী ক্ৰিকেটত ছৰফৰাজৰ নামত আছে ১৫টা শতক আৰু ১৪টা অৰ্ধশতক। ব্যক্তিগত সৰ্বোচ্চ স্ক’ৰ হৈছে ৩০১।
উল্লেখ্য যে, বেংগালুৰুত চলি থকা টেষ্ট শৃংখলাৰ প্ৰথমখন মেচত ভাৰতে নিজৰ প্ৰথম ইনিংছত শোচনীয় প্ৰদৰ্শন আগবঢ়াই মাত্ৰ ৪৬ ৰানতে অলআউট হৈছিল। ইয়াৰ প্ৰত্যুত্তৰত আলহী দল নিউজিলেণ্ডে নিজৰ প্ৰথম ইনিংছত ৪০২ ৰানৰ স্ক’ৰ সংগ্ৰহ কৰি ৩৫৬ ৰানৰ বৃহত অগ্ৰগতি লাভ কৰিছিল।
অৱশ্যে দ্বিতীয় ইনিংছত ভাৰতে সুন্দৰ বেটিং প্ৰদৰ্শন আগবঢ়াই এই পৰ্যন্ত তিনিটা উইকেট হেৰুৱাই ৩২২ ৰান সংগ্ৰহ কৰিছে। বৰ্তমান ক্ৰিজত আছে ছৰফৰাজ আৰু ঋষভ পন্ত।
