মৰুৰ দেশ ছৌদি আৰৱত এক অভূতপূৰ্ব পৰিৱেশ দেখিবলৈ পোৱা গৈছে। প্ৰকৃততে কি হৈছে সেইটো সহজে বিশ্বাস কৰিবলৈ টান পাইছে দেশখনৰ জনসাধাৰণে। সাধাৰণতে শুষ্ক জলবায়ুৰ বাবে পৰিচিত দেশখনৰ বিভিন্ন প্ৰান্তত প্ৰচণ্ড বৰফ পৰাৰ ফলত আচৰিত পৰিৱেশৰ সৃষ্টি হৈছে।
শেহতীয়াকৈ আল-জাউফ অঞ্চলত হোৱা প্ৰচণ্ড তুষাৰপাতে সকলোকে আচৰিত কৰি তুলিছে। তুষাৰপাতৰ এই ঘটনাই কেৱল স্থানীয় ৰাইজক আচৰিত কৰাই নহয়, সমগ্ৰ বিশ্বৰ মানুহৰ বাবেও এক আলোচনাৰ বিষয় হৈ পৰিছে।
সংবাদ মাধ্যমৰ খবৰ অনুসৰি আল-জাউফ অঞ্চলত বিগত কিছুদিন ধৰি ধাৰাসাৰ বৰষুণ আৰু শিলাবৃষ্টি হৈছে। এই তুষাৰপাতৰ বাবেই মৰুভূমিৰ ওপৰত শুভ্ৰ দলিচাৰ এক আৱৰণ পৰা পৰিলক্ষিত হৈছে।
উল্লেখ্য যে, সাধাৰণতে ছৌদি আৰৱত এই ধৰণৰ বৰফ পৰা কেতিয়াও দেখা পোৱা নাই। এই অস্বাভাৱিক বৰষুণৰ বাবে এতিয়া সমগ্ৰ অঞ্চলটোৰ উষ্ণতা যথেষ্ট পৰিমানে হ্ৰাস পাইছে।
ইফালে এই শিলাবৃষ্টিৰ পিছত ছ’চিয়েল মিডিয়াৰ জৰিয়তে বহু লোকে কয় যে পৃথিৱীৰ ধ্বংসৰ দিশে গতি কৰিছে। আন একাংশৰ মতে এয়া গোলকীয় উষ্ণতাৰ প্ৰভাৱ।
উল্লেখ্য যে, মৰুভূমি অঞ্চলত তীব্ৰ তুষাৰপাত বা বৰষুণৰ এয়া প্ৰথম ঘটনা নহয়। কিছু বছৰ পূৰ্বে চাহাৰা মৰুভূমিৰ এখন চহৰৰ তাপমাত্ৰা -২ ডিগ্ৰী চেলছিয়াছলৈ হ্ৰাস পাইছিল, যাৰ ফলত শিলাবৃষ্টিৰ ধুমুহা হৈছিল। জলবায়ু পৰিৱৰ্তনৰ বাবেই মৰুভূমি অঞ্চলত বৰফ পৰে বিজ্ঞানীসকলে অভিহিত কৰে।
