ৰাজা ৰঘুবংশীৰ হত্যাকাণ্ডত ব্যৱহৃত দ্বিতীয়টো অস্ত্ৰ উদ্ধাৰ কৰে মেঘালয় আৰক্ষীয়ে। মঙলবাৰে ক্ৰাইম ছীন ৰিক্ৰিয়েশ্যনৰ সময়ত অভিযুক্তই কয় যে হত্যাত ব্যৱহৃত দাখন খাৱৈত পেলাই দিয়া হৈছিল। আৰক্ষীৰ সৈতে এছডিআৰএফৰ এটা অনুসন্ধানকাৰী দলো আছিল।
অভিযুক্তই উল্লেখ কৰা স্থানত মেটেল ডিটেক্টৰেৰে তালাচী চলোৱাৰ পিছতে হত্যাকাণ্ডত ব্যৱহৃত অস্ত্ৰটো উদ্ধাৰ কৰা হয়।
উল্লেখ্য যে, ৰাজা ৰঘুবংশীৰ হত্যাকাণ্ডত ব্যৱহাৰ হৈছিল দুটাকৈ অস্ত্ৰ। ২ জুনত উদ্ধাৰ হৈছিল প্ৰথমটো অস্ত্ৰ। ইয়াৰ উপৰি ইন্দোৰত উপস্থিত আছে আৰক্ষীৰ এটা দল। হত্যাৰ পিছত সোনমে থকা ফ্লেটটোত তালাচী চলোৱা হয়। অৱশ্যে ইয়াত একো উদ্ধাৰ হোৱা নাই। দলটোৱে তাতেই থাকিব আৰু সোনম আৰু আন অভিযুক্তৰ পৰিয়ালক জেৰা চলোৱা হ’ব।
ৰাজা ৰঘুবংশী হত্যাকাণ্ডৰ তদন্তৰ সন্দৰ্ভত মঙলবাৰে শ্বিলং আৰক্ষীৰ এছ আই টি দলে হত্যাকাণ্ডৰ সমগ্ৰ ঘটনাৰ ক্ৰম বুজিবলৈ ছীন ৰিক্ৰিয়েট কৰে। আৰক্ষীৰ দলটোৱে সোনম আৰু তিনিওজন মূল অভিযুক্ত বিশাল, আনন্দ আৰু আকাশক লৈ পুৱা প্ৰায় ১০:৩০ বজাত সদৰ থানাৰ পৰা ওলাই আহি ১২:১৫ বজাত মাৱালখিয়াট গাঁৱত উপস্থিত হয়, য’ৰ পৰা ডাবল ডেকাৰ দলংলৈ যোৱা পথটো আৰম্ভ হয়।
উল্লেখ্য যে, ১১ মে’ত বিবাহ পাশত আৱদ্ধ হোৱাৰ পিছতে কিছুদিন পূৰ্বে মধুচন্দ্ৰিকাৰ বাবে মেঘালয়ৰ শ্বিলঙলৈ আহিছিল ৰাজা ৰঘুবংশী আৰু সোনম ৰঘুবংশী। ইয়াৰ পিছতেই ২৩ মে’ত ৰহস্যজনকভাৱে দুয়োজন নিৰুদ্দেশ হয়। এই ঘটনাৰ ১০ দিন পিছত অৰ্থাত ২ জুনত ৰাজাৰ মৃতদেহ উদ্ধাৰ হৈছিল যদিও নিৰুদ্দেশ হৈয়েই থাকে সোনম।
ইয়াৰ পিছত আৰক্ষীয়ে তদন্ত আৰম্ভ কৰি ঘটনা সন্দৰ্ভত ৮ জুনত গ্ৰেপ্তাৰ কৰে সোনম আৰু আন সতীৰ্থসকলক। সোনম আৰু তেওঁৰ সহযোগীসকলক গ্ৰেপ্তাৰৰ পিছতেই ঘটনাক লৈ ন-ন তথ্য পোহৰলৈ আহি আছে।
