বাংলাদেশৰ কিংবদন্তি অলৰাউণ্ডাৰ ছাকিব আল হাছানে টেষ্ট ক্ৰিকেটৰ পৰা অৱসৰ ঘোষণা কৰিছে। দক্ষিণ আফ্ৰিকাৰ বিৰুদ্ধে মিৰপুৰ টেষ্ট মেচখন হ’ব ছাকিবৰ কেৰিয়াৰৰ অন্তিমখন টেষ্ট মেচ।
উল্লেখ্য যে ২৭ ছেপ্টেম্বৰ অৰ্থাত কাইলৈৰ পৰা ভাৰত আৰু বাংলাদেশৰ মাজত টেষ্ট ছিৰিজৰ দ্বিতীয়খন মেচ অনুষ্ঠিত হ’ব। ইয়াৰ পূৰ্বে ছাকিবে অৱসৰৰ কথা ঘোষণা কৰি অনুৰাগীক আচৰিত কৰি তুলিছে।
টেষ্ট ক্ৰিকেটৰ উপৰি ছাকিবে টি-২০ আন্তঃৰাষ্ট্ৰীয়ৰ পৰাও নিজকে আঁতৰাই ৰখাৰ সিদ্ধান্ত লৈছে।
২০০৭ চনৰ পৰা টি-২০ বিশ্বকাপৰ প্ৰতিটো সংস্কৰণতে অংশগ্ৰহণ কৰি ২০২৪ চনৰ সংস্কৰণত প্ৰতিযোগিতাখনৰ সৰ্বকালৰ সৰ্বাধিক উইকেট দখলকাৰী হিচাপে পৰিগণিত হৈছিল ছাকিব। ভাৰতৰ বিৰুদ্ধে দ্বিতীয়খন টেষ্ট খেলৰ পূৰ্বে সাংবাদিকৰ সৈতে হোৱা কথা-বতৰাত ছাকিবে টেষ্ট আৰু এদিনীয়া ফৰ্মেটৰ বাবেও নিজৰ পৰিকল্পনা প্ৰকাশ কৰে।
আগষ্ট মাহত শ্বেখ হাছিনাৰ শাসনত ৰাজনৈতিক অস্থিৰতাৰ পিছত ৩৭ বছৰীয়া ছাকিবে বাংলাদেশলৈ যোৱা নাই। অলৰাউণ্ডাৰগৰাকীয়ে নিশ্চিত কৰিছে যে তেওঁ বাংলাদেশৰ হৈ অন্তিমখন টেষ্ট মিৰপুৰত খেলাৰ সম্ভাৱনা আছে।
অৱশ্যে যদিহে নিৰাপত্তাৰ দিযটোৱে এই ক্ষেত্ৰত বাধাৰ সৃষ্টি কৰে তেন্তে কানপুৰত ভাৰতৰ বিৰুদ্ধে অনুষ্ঠিত হ’বলগীয়া টেষ্টখনেই হ’ব তেওঁৰ বগা জাৰ্চি পিন্ধা অন্তিমখন টেষ্ট মেচ।
