আজি মহাপুৰুষ শংকৰদেৱৰ আৱিৰ্ভাৱ তিথি,হৰিনামেৰে মুখৰিত হৈছে ৰাজ্য

আজি অসমীয়া সমাজ জীৱনৰ প্ৰাণ প্ৰতিষ্ঠাতা মহাপুৰুষ শ্ৰীমন্ত শংকৰদেৱৰ ৫৭৬ সংখ্যক আৱিৰ্ভাৱ তিথি।বৈষ্ণৱ ধৰ্ম, এক শৰণ নামধৰ্মৰ প্ৰতিষ্ঠাপক জগতগুৰু শ্ৰীমন্ত শংকৰদেৱ অসমীয়া জাতি-সাহিত্য-সংস্কৃতিৰ-নিৰ্মাতা।

ঐতিহাসিক গাথাৰে অনাদি কাললৈ খ্যাতি ৰাখি থৈ যোৱা মহাপুৰুষজনাৰ জীৱন আছিল সাধনা আৰু সৃষ্টিৰ এক অপূৰ্ব সমাহাৰ।আজিৰ এই পৱিত্ৰ দিনটোত ৰাজ্যৰ প্ৰতিখন সত্ৰ-নামঘৰৰ লগতে ৰাজ্যবাসীয়ে মহাপুৰুষজনাক শ্রদ্ধাৰে সোঁৱৰিছে।

 মহাপুৰুষজনাৰ জন্ম তিথি উপলক্ষে উজনিৰ পৰা নামনিলৈ হৰিনামৰ ধ্বনিৰে মুখৰিত হৈ পৰিছে ৰাজ্যৰ সত্ৰ-নামঘৰসমূহ। ভক্তিৰসত বিলীন হৈ পৰিছে সকলো ভকত-বৈষ্ণৱ।

১৪৪৯ খ্ৰীষ্টাব্দত আহিন-কাতি মাহত বৰদোৱাৰ আলিপুখুৰীত পিতৃ কুসুম্বৰ ভূঞা আৰু মাতৃ সত্যাসন্ধা দেৱীৰ ঔৰষত জন্মগ্ৰহণ কৰিছিল শ্ৰীমন্ত শংকৰদেৱে। বুঢ়ীমাক খেৰসুতীয়ে তেওঁক তুলি-তালি ডাঙৰ-দীঘল শংকৰৰ সৰুতে পৰা পঢ়াৰ প্ৰতি বিশেষ ধাউতি নাছিল। বুঢ়ীমাক খেৰসুতীয়ে ১২ বছৰ বয়সত মহেন্দ্ৰ কন্দলি টোলত তেওঁক নাম লগাই দিছিল।

মহাপুৰুষ জনাই অসমত নৱ-বৈষ্ণৱ ধৰ্ম প্ৰচাৰ কৰিছিল। আজিৰ এই পৱিত্ৰ দিনটোত হাজাৰ ধৰ্মপ্ৰাণ ৰাইজে বন্তি-শৰাই নৈবেদ্য আগবঢ়াই নিজৰ লগতে পৰিয়ালৰ মংগল কামনাৰে গুৰুজনাৰ শ্ৰীচৰণত সেৱা নিবেদন কৰিছে।