মঙলবাৰৰ নিশাৰ পৰা হোৱা ধাৰাসাৰ বৰষুণৰ ফলশ্ৰুতিত বুধবাৰে নাগালেণ্ডৰ চুমৌকেদিমা জিলাৰ ডিমাপুৰ-কহিমা ২৯ নং ৰাষ্ট্ৰীয় ঘাইপথৰ ফেৰিমাত সংঘটিত ভয়ংকৰ ভূমিস্খলনৰ ফলত ৬ জন লোকে প্ৰাণ হেৰুওৱাৰ খবৰ আহিছে।
লাভ কৰা তথ্য অনুসৰি, ভূমিস্খলনৰ ফলত মৃত্যু হোৱা লোকসকলৰ ভিতৰত আছে ৫ জন পুৰুষ আৰু এগৰাকী মহিলা।
এই ঘটনাত আৰু কোনো লোক নিৰুদ্দেশ হৈ আছে নেকি তাৰ সবিশেষ জানিব পৰা হোৱা নাই যদিও চৰকাৰ-প্ৰশাসনৰ লোকৰ লগতে ৰাজ্যিক দুৰ্যোগ সঁহাৰি বাহিনী (এছ ডি আৰ এফ)য়ে অনুসন্ধান আৰু উদ্ধাৰ অভিযান অব্যাহত ৰাখিছে।
ফেৰিমাত হোৱা ভূমিস্খলনৰ উপৰিও পিফেমাৰ অন্তৰ্গত ছেইপামাত আৰু নিউ চুমৌকেদিমাৰ অন্তৰ্গত পাগালা পাহাৰত চাথে নদীৰ বাঢ়নী পানীৰ ফলত ৰাষ্ট্ৰীয় ঘাইপথ সম্পূৰ্ণৰূপে বিচ্ছিন্ন হৈ পৰে। নাগালেণ্ড-মণিপুৰক সংযোগ কৰা এই পথছোৱা বন্ধ হৈ পৰাৰ ফলত যথেষ্ট সমস্যাৰ সন্মুখীন হৈছে সাধাৰণ জনতা।
ইফালে এই কৰুণ ঘটনাত শোক প্ৰকাশ কৰি ৰাজ্যখনৰ মুখ্যমন্ত্ৰী নেইফিউ ৰিঅ’ৱে মৃত্যু হোৱা লোকসকলৰ পৰিয়ালক এককালীন আৰ্থিক সাহায্য প্ৰদান কৰিব বুলিও ঘোষণা কৰে।
