দুৰ্নীতিৰ অভিযোগত শ্ৰীলংকাৰ প্ৰাক্তন ৰাষ্ট্ৰপতি ৰনিল বিক্ৰমসিংঘেক গ্ৰেপ্তাৰ কৰা হৈছে। সংবাদ সংস্থা এ এফ পিৰ এক প্ৰতিবেদন অনুসৰি ২০২৩ চনৰ ছেপ্টেম্বৰ মাহত এখন ব্ৰিটিছ বিশ্ববিদ্যালয়ত পত্নীক সন্মান জনোৱাৰ উদ্দেশ্যে আয়োজিত এক অনুষ্ঠানত অংশগ্ৰহণ কৰিবলৈ লণ্ডনলৈ যোৱা ভ্ৰমণ সন্দৰ্ভত সোধা-পোছা কৰাৰ পিছত বিক্ৰমসিংঘেক আটক কৰা হয়।
প্ৰতিবেদন অনুসৰি এজন বিষয়াই কয় যে তেওঁক কলম্বো ফ’ৰ্টৰ দণ্ডাধীশৰ সন্মুখত হাজিৰ কৰোৱা হ’ব। বিক্ৰমসিংঘেই দেশৰ সম্পদ ব্যক্তিগত কামত ব্যৱহাৰ কৰাৰ অভিযোগ উত্থাপন হৈছে।
উল্লেখ্য যে, ২০২৩ চনত জি-৭৭ শীৰ্ষ সন্মিলনত অংশগ্ৰহণ কৰি হাভানাৰ পৰা উভতি অহাৰ সময়ত লণ্ডনত ৰৈছিল প্ৰাক্তন ৰাষ্ট্ৰপতিগৰাকীয়ে। লণ্ডনৰ এখন বিশ্ববিদ্যালয়ত অনুষ্ঠিত এক অনুষ্ঠানত অংশগ্ৰহণ কৰে বিক্ৰমসিংঘে আৰু তেওঁৰ পত্নী মাইট্ৰিয়ে।
ব্যক্তিগত ভ্ৰমণৰ বাবে চৰকাৰী ধন ব্যৱহাৰ কৰাৰ অভিযোগ উত্থাপন হোৱাৰ পিছতে বিক্ৰমসিংঘেই স্পষ্টীকৰণ দিছিল যে তেওঁৰ ভ্ৰমণৰ খৰচ তেওঁৰ পত্নীয়ে নিজেই বহন কৰিছিল আৰু ইয়াত চৰকাৰী ধন ব্যৱহাৰ কৰা হোৱা নাছিল।
ইফালে আৰক্ষীয়ে অভিযোগ কৰে যে বিক্ৰমসিংঘেই ব্যক্তিগত ভ্ৰমণৰ বাবে চৰকাৰী ধন ব্যৱহাৰ কৰিছিল। আৰক্ষীৰ মতে, তদন্তত বিক্ৰমসিংঘেৰ দেহৰক্ষীকো চৰকাৰী কোষাগাৰৰ পৰা ধন দিয়া বুলি জানিব পৰা গৈছে।
এই সমগ্ৰ বিষয়ত নিজৰ বক্তব্য লিপিবদ্ধ কৰিবলৈ চিআইডিৰ কাৰ্যালয়ত উপস্থিত হোৱাৰ পিছতে তেওঁক গ্ৰেপ্তাৰ কৰা হয়।
