ইৰাণ যুদ্ধৰ মাজতে ছুইজাৰলেণ্ডে আমেৰিকাৰ সামৰিক বিমানৰ বাবে নিজৰ আকাশমাৰ্গৰ ব্যৱহাৰ নিষিদ্ধ কৰাৰ এক উল্লেখযোগ্য সিদ্ধান্ত গ্ৰহণ কৰিছে। চুইজাৰলেণ্ড চৰকাৰে কয় যে, তেওঁলোকৰ দীৰ্ঘদিনীয়া নীতি হৈছে নিৰপেক্ষ হৈ থকা আৰু সেয়েহে সংঘাতৰ সৈতে জড়িত আমেৰিকাৰ বিমানসমূহক ইয়াৰ আকাশমাৰ্গৰ মাজেৰে পাৰ হ’বলৈ দিয়া নহ’ব।
১৪ মাৰ্চত জাৰি কৰা এক বিবৃতিত চৰকাৰে কয় যে, ১৫ মাৰ্চত চুইজাৰলেণ্ডৰ আকাশমাৰ্গৰ মাজেৰে দুখন আমেৰিকাৰ গোপন বিমান উৰণৰ অনুমতি দিয়া হোৱা নাছিল। বিষয়াসকলৰ মতে, এই বিমানসমূহ ইৰাণৰ সৈতে চলি থকা যুদ্ধৰ সৈতে প্ৰত্যক্ষভাৱে জড়িত আছিল, আৰু সেয়েহে, অনুমোদন লাভ কৰা হোৱা নাছিল।
কিন্তু চুইজাৰলেণ্ড চৰকাৰে আমেৰিকাৰ আন তিনিখন বিমানত অনুমোদন জনায় ১৫ মাৰ্চত দুখন পৰিবহণ বিমান আৰু ১৭ মাৰ্চত এখন মেইণ্টেনেন্স বিমান। চুইছ ফেডাৰেল কাউন্সিলে কেইবাটাও অনুৰোধ পৰ্যালোচনা কৰি এই সিদ্ধান্ত গ্ৰহণ কৰে। এই অনুৰোধসমূহ আহিছিল এনে কূটনৈতিক অনুমতি চম্ভালি থকা ফেডাৰেল অফিচ অৱ চিভিল এভিয়েশনলৈ। ছুইজাৰলেণ্ডে স্পষ্ট কৰি দিয়ে যে, মানৱীয় বা চিকিৎসা সাহায্য কঢ়িয়াই অনা বিমানৰ অনুমতি অব্যাহত থাকিব। উদাহৰণস্বৰূপে, আহত লোকক কঢ়িয়াই অনা বিমান বা সাহায্য অভিযানে চুইজাৰলেণ্ডৰ আকাশমাৰ্গ ব্যৱহাৰ কৰিব পাৰে।
আমেৰিকা আৰু ইৰাণৰ যুদ্ধ তৃতীয় সপ্তাহত ভৰি দিয়াৰ সময়তে ছুইজাৰলেণ্ডৰ এই সিদ্ধান্ত। ২৮ ফেব্ৰুৱাৰীত আমেৰিকা আৰু ইজৰাইলে ইৰাণক আক্ৰমণ কৰাৰ সময়ত যুদ্ধ আৰম্ভ হৈছিল। খবৰ অনুসৰি, এই যুদ্ধত এতিয়ালৈকে ২০০০ৰো অধিক লোকৰ মৃত্যু হৈছে, ইয়াৰে অধিকাংশই ইৰাণী।
এই সংঘাতৰ ফলত বিশ্বৰ তেল যোগানতো প্ৰভাৱ পৰিছে। ইফালে উপসাগৰীয় অঞ্চলৰ পৰা তেল আমদানি কৰা দেশসমূহক জাহাজ সুৰক্ষাৰ বাবে নৌসেনা বাহিনী প্ৰেৰণ কৰিবলৈ আহ্বান জনাইছে ড’নাল্ড ট্ৰাম্পে। খাৰ্গ দ্বীপত আমেৰিকাৰ আক্ৰমণৰ পিছত ইৰাণে প্ৰতিশোধৰ ভাবুকি দিছিল আৰু হৰমুজ জলদ্বীপৰ আশে-পাশে উত্তেজনা বৃদ্ধি পাইছে।
