প্ৰতিজন ক্ৰিকেট অনুৰাগীৰ দৃষ্টি বৰ্তমান চেম্পিয়নছ ট্ৰফী ২০২৫ৰ ওপৰত। ফেব্ৰুৱাৰী আৰু মাৰ্চ মাহত অনুষ্ঠিত হ’বলগীয়া এই প্ৰতিযোগিতাখনৰ আয়োজন কৰিব পাকিস্তানে।চেম্পিয়নছ ট্ৰফী ২০২৫ ক’ত কেনেকৈ আয়োজন কৰা হ’ব সেই লৈ বিতৰ্ক অব্যাহত আছে।
পিছে আইচিচিয়ে বৰ্তমানেও ঘোষণা কৰা নাই প্ৰতিযোগিতাখনৰ সময়সূচী। ইয়াৰ আঁৰৰ আটাইতকৈ ডাঙৰ কাৰণ হৈছে, ভাৰত আৰু পাকিস্তানৰ মাজত চলি থকা বিবাদ। আচলতে টীম ইণ্ডিয়াই এই টুৰ্ণামেণ্টৰ বাবে পাকিস্তানলৈ যাবলৈ আগ্ৰহী নহয়।
কিন্তু পিচিবি (PAKISTAN CRICKET BOARD)য়ে নিজ দেশতে সমগ্ৰ প্ৰতিযোগিতাখন পৰিচালনা কৰিব বিচাৰিছে। এনে পৰিস্থিতিত আইচিচিয়ে ২৯ নৱেম্বৰত সকলো ব’ৰ্ডৰ বৈঠকৰ আয়োজন কৰিছিল, যাতে এই প্ৰতিযোগিতাখনৰ চূড়ান্ত সিদ্ধান্ত ল’ব পৰা যায়। কিন্তু এই বৈঠক পিছুৱাই দিয়া হৈছে।
চেম্পিয়নছ ট্ৰফী ২০২৫ৰ সন্দৰ্ভত বৰ্তমান পাকিস্তান ক্ৰিকেট ব’ৰ্ড অকলে থিয় দিছে। যদিহে পাকিস্তান ক্ৰিকেট ব’ৰ্ডে এই বৈঠকত নিজৰ জোৰত অটল হৈ থাকে, তেন্তে বৃহৎ আৰ্থিক লোকচানৰ সন্মুখীন হ’ব পাৰে।
আশা কৰা হৈছে যে, অহা ২৪-৪৮ ঘণ্টাৰ ভিতৰত ইয়াৰ সমাধান পোৱা যাব আৰু তাৰ পিছত আইচিচিয়েও চেম্পিয়নছ ট্ৰফী ২০২৫ৰ সূচী ঘোষণা কৰিব, কাৰণ এতিয়া এই প্ৰতিযোগিতা আৰম্ভ হ’বলৈ ৩ মাহতকৈও কম সময় বাকী আছে।
উল্লেখ্য যে, আই চি চি টুৰ্ণামেণ্ট আৰু এছিয়া কাপৰ সময়তহে ভাৰত আৰু পাকিস্তানৰ মাজত খেল অনুষ্ঠিত হয়। ইয়াৰ পূৰ্বে পাকিস্তানেও এছিয়া কাপ ২০২৩ৰ আয়োজকৰ অধিকাৰ লাভ কৰিছিল।
কিন্তু তেতিয়াও ভাৰতীয় দলটোৱে পাকিস্তান ভ্ৰমণ কৰা নাছিল। এই প্ৰতিযোগিতাখন হাইব্ৰিড মডেলত আয়োজন কৰা হৈছিল। তাৰ পিছত টীম ইণ্ডিয়াই শ্ৰীলংকাত সকলো খেল খেলিছিল আৰু ইয়াতেই ফাইনেলও অনুষ্ঠিত হৈছিল। অৰ্থাৎ একেটা সূত্ৰকে আকৌ এবাৰ চেষ্টা কৰিব পাৰি।
