চেম্পিয়নছ ট্ৰফী ২০২৫ৰ বাবে এতিয়াও কথা ঘোষণা কৰা হোৱা নাই যদিও টীম ইণ্ডিয়াৰ কমাণ্ড যে ৰোহিত শৰ্মাৰ হাতত থাকিব সেয়া নিশ্চিত হৈ পৰিছে। বিগত কেইমাহমানৰ পৰা দুৰ্বল ফৰ্ম আৰু গড় অধিনায়কত্বৰ বাবে হেঁচা বৃদ্ধি পোৱাৰ পাছতো ৰোহিতে এই প্ৰতিযোগিতাত দলৰ অধিনায়ক হৈ থাকিব।
যদিও বৰ্তমানৰ বাবে অধিনায়কত্ব অক্ষত আছে যদিও ৰোহিতৰ বেটিং ফৰ্ম অত্যন্ত চিন্তাৰ বিষয় হৈয়ে আছে। কেৱল এয়াই নহয়, ৰোহিতে এতিয়া মুম্বাইৰ ৰঞ্জী ট্ৰফী দলৰ সৈতে অনুশীলন আৰম্ভ কৰিবলৈ ওলাইছে, যাৰ ফলত এই প্ৰতিযোগিতাৰ পূৰ্বে ৰোহিতে ৰঞ্জী মেচ খেলিব নে নাই তাক লৈ কৌতুহল বৃদ্ধি হৈছে।
অষ্ট্ৰেলিয়া ভ্ৰমণত আৰু তাৰ পূৰ্বে ঘৰুৱা ক্ষেত্ৰত নিউজিলেণ্ড আৰু বাংলাদেশৰ বিৰুদ্ধে টেষ্ট শৃংখলাত ৰোহিত শৰ্মাই বেয়াকৈ ফ্লপ কৰিছিল। তাৰ পিছৰে পৰা তেওঁৰ দলৰ বাহিৰত থকা বা অৱসৰ লোৱাৰ জল্পনা-কল্পনা তীব্ৰতৰ হৈ পৰিছে। পিছে এতিয়া দাবী কৰা হৈছে যে, চেম্পিয়নছ ট্ৰফীৰ পিছত তেওঁ সম্পূৰ্ণৰূপে অৱসৰ ল’ব।
এই দাবীৰ মাজতে চেম্পিয়নছ ট্ৰফীৰ বাবে নিজকে প্ৰস্তুত কৰিবলৈ আৰম্ভ কৰিছে ৰোহিতে। এক প্ৰতিবেদনত দাবী কৰা হৈছে যে, ভাৰতীয় অধিনায়কগৰাকীয়ে ইতিমধ্যে মুম্বাইৰ এমচিএ-বিকেচি খেলপথাৰত অনুশীলন আৰম্ভ কৰিছে আৰু এতিয়া ১৪ জানুৱাৰী মঙলবাৰৰ পৰাই মুম্বাই দলৰ সৈতে অনুশীলন আৰম্ভ কৰিব। ইফালে মুম্বাই দলটোৱে ২৩ জানুৱাৰীৰ পৰা আৰম্ভ হ’বলগীয়া ৰঞ্জী ট্ৰফীৰ দ্বিতীয় পৰ্যায়ত খেলিব আৰু ইয়াৰ বাবে মঙলবাৰৰ পৰা দলটোৱে প্ৰস্তুতি আৰম্ভ কৰিব।
আন এক প্ৰতিবেদনত প্ৰকাশ কৰা অনুসৰি ৰোহিতে দলটোৰ সৈতে অনুশীলনত অংশ ল’ব যদিও ৰঞ্জী ট্ৰফীৰ মেচ খেলিবলৈ তেওঁ উপলব্ধ হ’ব নে নাই সেই সন্দৰ্ভত এতিয়াও কোনো তথ্য নাই। ২৩ জানুৱাৰীৰ পৰা গ্ৰুপ ৰাউণ্ডৰ খেলখনত মুম্বাইৰ বিৰুদ্ধে জম্মু-কাশ্মীৰৰ বিৰুদ্ধে খেলিব। এই সূত্ৰই জনোৱা মতে, ৰোহিতে অতি সোনকালে এই বিষয়েও এমচিএক অৱগত কৰিব।
